Copernicus eleva a 138.689 hectáreas a superficie queimada en Ourense en agosto
O Sistema Europeo de Información de Incendios Forestais (EFFIS) confirma máis de 144.000 hectáreas calcinadas en Galicia desde xullo, con todos os lumes xa en situación de control.
Por Europa Press / Redacción | Santiago de Compostela | 29/08/2025 | Actualizada ás 18:55
O Sistema de Información de Incendios Forestais (EFFIS polas súas siglas en inglés) do programa europeo Copernicus axustou a súa estimación de hectáreas queimadas por incendios forestais en Galicia, situando dita estimación en 138.689 hectáreas, no que vai de mes de agosto.
Segundo os últimos datos, actualizados ata este venres, no mes de agosto arderon na provincia de Ourense 138.689 hectáreas; outras 2.121 na provincia de Lugo; 1.614 hectáreas na provincia de Pontevedra; e 1.249 hectáreas na Coruña. Este sistema de medición, mediante imaxes vía satélite, realizou os axustes á baixa basicamente na superficie queimada na provincia de Ourense.
Os rexistros do EFFIS suman, no mes de xullo, un total de 734 hectáreas calcinadas en toda Galicia: 330 hectáreas na provincia de Pontevedra, outras 298 hectáreas en Ourense, 54 hectáreas en Lugo e 42 hectáreas na Coruña. Deste xeito, desde principios de xullo, segundo Copernicus, arderon en Galicia algo máis de 144.000 hectáreas.
Precisamente, este venres o presidente da Xunta, Alfonso Rueda, deu a coñecer os cálculos de superficie calcinada que manexa o goberno galego: unhas 96.500 hectáreas entre xullo e agosto (con 666 focos de lume só no actual mes). Este venres tamén, segundo os datos do parte informativo da Consellería de Medio Rural, quedaron en situación de 'controlado' todos os incendios en Galicia, tras mellorar a situación na Pobra do Brolló (Lugo) e Avión (Ourense), nos que arderon 900 e 250 hectáreas respectivamente.
