O debate sobre os incendios de 2025 sitúa a Rueda no centro da polémica: haberá dimisións na Xunta?

A xunta de portavoces do Parlamento de Galicia fixou para o próximo martes a comparecencia do presidente da Xunta, Alfonso Rueda, para informar sobre a vaga de incendios deste verán. BNG e PSdeG aproveitan para reclamar cesamentos no Goberno galego, criticando a xestión da catástrofe e pedindo responsabilidades que, segundo ambas formacións, deberían chegar ata o presidente.

Os nacionalistas, a través de Olalla Rodil, reclamaron directamente a dimisión de Rueda por considerar que “queda grande o cargo”, mentres que o PSdeG avanzou que as esixencias concretas de depuración de responsabilidades presentaranse no pleno. O portavoz do PPdeG, Alberto Pazos, criticou que a oposición pretenda extraer conclusións antes da comparecencia e lembrou que durante a vaga de 2006, cando gobernaba o bipartito, actuaran doutra maneira.

ALTERACIÓN NA ORDE HABITUAL DO PLENO

A comparecencia centrarase no operativo de extinción, as axudas aos afectados e medidas de recuperación, mentres que a sesión de control ao presidente, que se celebrará tamén o martes en lugar do mércores habitual, permitirá o cara a cara con Ana Pontón (BNG) e José Ramón Gómez Besteiro (PSdeG). Este cambio na orde do día xerou friccións coa oposición, que acusa o PP de intentar “anular” o debate e limitar a súa intervención.

Este cambio na orde dos puntos provocou friccións na xunta de portavoces co PP, que ten a maioría. O portavoz parlamentario popular, Alberto Pazos, entende que as preguntas da oposición "están relacionadas" co motivo da comparecencia, polo que ve "incomprensible" que se quixesen manter en días distintos.

A pregunta que formulará Besteiro a Rueda si será sobre incendios, aínda que a de Pontón está exposta dunha forma máis xeral, xa que interpelará ao presidente sobre se cre "que responde aos retos que Galicia ten por diante", entre eles os lumes. Neste contexto, a viceportavoz do Bloque censurou as "manobras políticas" do PP ao "romper un consenso que impera desde o inicio da autonomía" para que a sesión de control sexa o mércores. A intención dos populares, en palabras de Rodil, é "anular" o careo cos líderes da oposición.

Espinosa (PSdeG) foi máis crítica con este "atropelo democrático" do PP, que quere --dixo-- "tapar a voz da oposición e que quede subsumida na comparecencia" do martes. Tamén suscitou as críticas da oposición a inclusión na orde do día deste primeiro pleno a iniciativa lexislativa popular (ILP), que chega ao Parlamento tras recoller polo menos 10.000 firmas, para solicitar o fin da "manipulación" na Corporación de Servizos Audiovisuais de Galicia (CSAG) --antiga CRTVG--.

XESTIÓN "NEGLIXENTE"

Máis aló destas cuestións, tanto nacionalistas como socialistas criticaron a xestión da Xunta, sinalando unha actuación “neglixente” ante a maior vaga de incendios da historia de Galicia, con máis de 162.000 hectáreas afectadas. Ademais, cuestionan a preparación dos brigadistas e as condicións laborais, e insisten en que Rueda debe dar a cara pola súa responsabilidade na planificación e coordinación do dispositivo.

"A Rueda quédalle grande o cargo. É un presidente que oculta información, que mente, que utiliza cun carroñeirismo político indecente e antepón a catástrofe e os intereses de Galicia á estratexia do PP", denunciou a nacionalista. En calquera caso, o BNG tamén impulsará a comparecencia no pleno das conselleiras de Medio Rural e Medio Ambiente, María José Gómez e Ángeles Vázquez.

A viceportavoz socialista, quen foi ministra de Medio Ambiente con Zapatero, insistiu en que as competencias en materia de incendios son "única e exclusivamente da Xunta". Por iso, cre que Rueda "ten que deixar dun lado para sempre ese aderezo de xestión de cartón pedra para dar a cara polo seu deixamento e desastre de xestión" ante a "maior vaga de incendios da historia". O Grupo Socialista tamén interpelará á conselleira de Medio Rural no pleno sobre a contratación dos brigadistas e as súas condicións laborais. "Mándase a xente cun simple curso de 16 horas a un traballo de alto risco", sinalou.

Pola súa banda, o deputado de Democracia Ourensana (DO), Armando Ojea, pediu que o Parlamento "non sexa un repetidor" no novo curso e que esta vaga de incendios abra a porta a cambios políticos en relación coa provincia de Ourense. Ojea valorou as axudas que a Xunta xa habilitou, pero cre que, "tal e como están pensadas" e pola súa "burocracia kafkiana", non van ser " suficientes". En calquera caso, o deputado de DO reclama non só investir en extinción do lume, senón tamén pensar "a longo prazo" en políticas que "revertan a discriminación estrutural" de Ourense.

O BNG PEDIRÁ A COMISIÓN NO SEGUINTE PLENO

Nos últimos días, o BNG tamén anunciara que pediría a constitución dunha comisión parlamentaria de investigación sobre os incendios deste verán. Rodil explicou que a proposta xa está rexistrada, pero votarase nun pleno posterior porque a cuestión require "un debate en profundidade": "Imos paso a paso". Preguntados respecto diso, o deputado de DO avanzou o seu apoio á creación da comisión, aínda que o PSdeG considera que non servirá "para nada". O seu viceportavoz remitiuse o que ocorreu o ano pasado coa comisión de contratos que promoveu o BNG --nese caso, puido facelo en solitario, sen votación-- e que só serviu para "ser un rodete máis do PP".

O PPDEG NON DESCARTA "ALGÚN CAMBIO PUNTUAL OU REMODELACIÓN"

O portavoz parlamentario do PPdeG, Alberto Pazos, non descarta que haxa "algún cambio puntual ou remodelación" no Goberno galego tras a vaga de incendios de agosto, aínda que ve ao presidente, Alfonso Rueda", "bastante satisfeito" coa actuación do seu equipo durante esta crise. Preguntado sobre o posible cesamento da conselleira de Medio Rural, María José Gómez, durante a rolda de prensa posterior á reunión da xunta de portavoces para fixar a orde do día do primeiro pleno do novo curso político no Parlamento galego, Pazos recoñeceu que hai "marxe de mellora" na xestión dos lumes deste verán.

Aínda que o dispositivo da Xunta é "o mellor que existe en toda Europa", admitiu que "ante novas circunstancias" que aumentan a voracidade dos incendios ata convertelos nos maiores da historia de Galicia, "cómpre analizar a marxe de mellora que teñen todas as administracións públicas". Neste contexto, o portavoz popular dixo que non ten "demasiadas dúbidas" de que o presidente está "bastante satisfeito de como actuou o seu equipo", polo que os eventuais cambios no Executivo poderían chegar "froito desas análises" e en función das próximas políticas que haxa que implementar. En todo caso, Pazos asegurou que no partido estan "francamente orgullosos do esforzo que se fixo" para combater esta vaga de incendios.