Por Europa Press / Redacción | SANTIAGO DE COMPOSTELA | 29/06/2016 | Actualizada ás 12:21
O presidente da Xunta, Alberto Núñez Feijóo, volveu cargar contra os enfermos de hepatite C, as súas familias e os cidadáns que acusan o seu Goberno de ter causado mortes polos retrasos na administración de tratamentos para esta enfermidade. Feijóo non só defende a actuación da Xunta, senón que ademais atrévese a cualifica de "indigna" a denuncia dos afectados e proclama que "a inmensa maioría dos facultativos" do Servizo Galego de Saúde (Sergas) comparten o seu posicionamento, tras volver rexeitar calquera atraso ligado a cuestións económicas.
Feijóo reafírmase nas súas críticas e carga sen miramentos contra os impulsores dunha denuncia promovida pola Plataforma de Afectados pola Hepatite C e polo colectivo Batas Brancas, co doutor Evaristo Varo á fronte, a raíz da que se abriu unha causa xudicial, con dous cargos destacados do Sergas investigados. Segundo o presidente da Xunta, os enfermos e as familias teñen uns intereses políticos que van máis aló das súas doenzas.
No pleno do Parlamento, dixo: "Coñezo perfectamente os intereses que hai detrás. Seino; por iso reitero: cando médicos que fan transplantes hepáticos a 100.000 euros cada transplante e despois din que se diminúe o diñeiro da Hepatite C, iso é indigno. E a inmensa maioría dos facultativos do Sergas consideran indigna esa denuncia e o seu posicionamento", espetou Feijóo a Antón Sánchez (AGE).
Previamente, Sánchez afeáralle o seu comportamento e instáralle a aclarar que considera "reprochable" da actitude dos médicos que "denunciaron unha situación" para salvar vidas". "Dende a súa poderosa posición ataca un traballador público coa actitude propia dun matón", advertiu ao presidente, afirmación que o presidente da Cámara, Miguel Santalices, retirou, e pola que foi chamado á orde dúas veces.
"Pois macarra!", apostilou a parlamentaria do Grupo Mixto Chelo Mártinez dende o seu escano, mentres que Feijóo, na súa quenda de réplica, non variou a súa postura e, tras garantir que se cumpriron os protocolos para tratar a enfermos de Hepatite C, asegurou que el "defenderá" a sanidade pública dos que buscan "deostar e humillar" o sistema. E é que, haseverou, "dicir que os pacientes morren por falta de diñeiro é indigno".
"Comprendo que haxa políticos, xornalistas ou médicos que intentan estender unha idea falsa do funcionamento da sanidade pública, pero que un político o faga na Cámara é desprezable. Que o reitere é dobremente desprezable. A súa catadura moral quedará reflectida no diario de sesións por segunda vez", afeou Feijóo a Sánchez, mentres que este ironizou con que "o amigo de Marcial dourado e de Pachi Lucas fale de catadura moral".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.