Piden vixiar que as adegas non compren uva a prezos "inferiores" ao custo de produción: "Non pode desaparecer un viticultor máis"
O sindicato Unións Agrarias instou á Xunta a realizar inspeccións para garantir o cumprimento da lei da cadea alimentaria.
Por Europa Press / Redacción | PONTEVEDRA | 11/09/2025 | Actualizada ás 15:50
O sindicato Unións Agrarias instou á Xunta a realizar inspeccións para garantir o cumprimento da lei da cadea alimentaria e evitar que nas adegas entre uva "por baixo" dos custos de produción durante esta vendima "histórica" na que xa se recolleron 38 millóns de quilos de uva. Así o sinalaron este xoves en rolda de prensa o responsable de área de Agricultura de UUAA, Carlos Basalo, e o vicesecretario xeral de UU.AA., Félix Porto.
Neste sentido, detallaron ter previsións moi positivas sobre esta vendima en canto a colleita, na Denominación de Orixe Rías Baixas xa se recolleron 31 millóns de quilos de uva, pero están preocupados pola posibilidade dunha caída do prezo da uva. Nesa DO está previsto que a vendima chegue a unha colleita de 50 millóns de quilos de uva, un volume, lamentaron desde UUAA, que a denominación de orixe "non ten a capacidade de absorber e que provocará un excedente que "podería distorsionar o mercado e baixar os prezos".
Actualmente, detallaron, en Rías Baixas prodúcese unha caída de prezos de 0,70 euro/quilo e os viticultores están alertas pola entrada de uva en b, que se vende a 0,30 ou 0,40 euro/quilo. Por iso, esixiron que se garanta que cada quilo de uva que entre nas adegas sexa a prezos suficientes e por enriba dos custos de produción, como establece a lei, e referíronse ás adegas para lembrarlles a obrigación de que todos os viticultores conten con contratos asinados nos que se estableza "con claridade" o prezo da uva antes de ser entregada.
Do total de quilos que xa se recolleron nesta vendima nas DO --38 millóns-- 31 deles pertencen a Rías Baixas, catro en Ribeiro, dous en Valdeorras, 400.000 quilos en Ribeira Sacra e apenas 100.000 en Monterrei, onde a vendima non arrincou do todo. Neste sentido, temen que volva repetirse a situación de anteriores campañas na Ribeira Sacra, onde 350 viticultores non tiveron quen lles recollese a uva. "Non podemos permitirnos o luxo de que desapareza un só viticultor máis", subliñou a organización agrogandeira, que apuntou a que, para iso, o prezo da uva é "unha cuestión fundamental".
PARALIZAR AXUDAS A GRANDES PLANTACIÓNS
Así mesmo, UUAA pediu á Xunta que "paralice" as axudas que destina a grandes plantacións xa que o consideran "ilóxico" cando hai problemas para dar saída á produción existente. "Non parece lóxico subvencionar a unha adega para comprar a súa propia uva. Algo que sucede neste momento", detallou Unións Agrarias. Por iso, avanzaron que remitirán unha carta a todas as adegas para lembrarlles "as súas obrigacións" en relación ao cumprimento da lei de cadea alimentaria.
