Xerais lanza 'Lume. Análise social dos incendios', sobre a probelmática dos lumes en Galicia

A editorial galega Xerais lanza en próximos días o libro 'Lume. Análise social dos incendios', un volume escrito polas sociólogas Elvira Santiago Gómez, Carmen Rodríguez Rodríguez e Ariadna Rodríguez Teijeiro, e que aborda a complexa realidade dos incendios en Galicia cun enfoque multidisciplinar. 'Lume' chegará ás librarías o 18 de setembro e analiza o fenómeno dos incendios como resultado de transformacións sociais, culturais e económicas, máis aló das connotacións do desastre natural.

Así, desenvolve unha clasificación pioneira que divide a evolución dos incendios en seis xeracións, analizando as súas causas e consecuencias desde unha perspectiva multidisciplinar. Destaca especialmente a análise das causas antrópicas (relacionadas coa actividade humana) e achega unha visión crítica sobre o despoboamento do rural, os cambios nos usos do territorio ou a destrución dos montes.

Igualmente, o libro, que tamén profunda en vagas de incendios como as de 2017 ou 2022, propón un modelo de xestión circular e integral, que integre prevención, extinción e recuperación, convidando a repensar a relación entre sociedade e natureza.

AUTORAS

Elvira Santiago Gómez é doutora en Socioloxía na Universidade da Coruña e o seu traballo aborda a xestión de riscos ambientais, a avaliación de novas tecnoloxías e a participación na toma de decisións controvertidas. Carmen Rodríguez Rodríguez é profesora de Socioloxía da Universidade da Coruña e os seus estudos céntranse en cuestións socioculturais e ambientais. Por último, Ariadna Rodríguez Teijeiro é doutora en Socioloxía e entre as súas liñas de investigación destaca a análise da comunicación social en situacións de crises e catástrofes.

Portada do libro 'Lume. Análise social dous incendios', de Xerais.. ED. XERAIS | Fonte: Europa Press