Un agresor sexual reincidente acepta 5 anos de cárcere por violar a unha muller en Vigo
O tribunal aplícalle a circunstancia atenuante de embriaguez, xa que tiña as súas capacidades "lixeiramente alteradas".
Por Europa Press / Redacción | VIGO | 24/09/2025 | Actualizada ás 11:09
A sección quinta da Audiencia Provincial de Pontevedra, con sede en Vigo, condenou a Juan Manuel P.M. como autor dun delito de violación á pena de 5 anos de prisión, tras unha vista de conformidade, na que o procesado aceptou os feitos e a pena imposta (xa declarada firme na sala).
A agresión produciuse na vía pública, en maio de 2024. Vítima e acusado atopábanse na rúa Areal, nun banco e, cando quedaron sós, el levouna cara a unha zona axardinada e violouna. O tribunal impúxolle 5 anos de cárcere, e aplícalle a circunstancia atenuante de embriaguez, xa que tiña as súas capacidades "lixeiramente alteradas" pola inxesta de alcol, así como a agravante de reincidencia, xa que Juan Manuel P.M. foi condenado por unha agresión sexual anterior.
Ademais da pena privativa de liberdade, a Audiencia imponlle a prohibición de achegarse ou comunicarse coa vítima durante 10 anos, e a medida de liberdade vixiada, tras saír de prisión, durante 5 anos. Igualmente, impúxolle a inhabilitación para desempeñar traballos ou actividades que impliquen contacto con menores durante un tempo de 10 anos, e deberá indemnizar á prexudicada en 5.000 euros. Inicialmente, a Fiscalía pedía para o acusado 10 anos e 9 meses de cárcere, e unha indemnización para a muller de 20.000 euros.
