Condenado a dous anos o alcalde de Verín por un delito contra a ordenación do territorio

A sección segunda da Audiencia Provincial de Ourense condenou a dous anos de prisión ao alcalde de Verín, Gerardo Seoane (PSOE), como autor dun delito contra a ordenación do territorio, mentres que foi absolto do delito de prevaricación urbanística do que estaba acusado. A sentenza non é firme, xa que contra ela cabe presentar recurso ante o Tribunal Superior de Xustiza de Galicia (TSXG).

Así mesmo, o tribunal impúxolle unha multa de 2.500 euros e inhabilitouno durante un ano para o exercicio da actividade de promotor de obras, así como para o exercicio do dereito do sufraxio pasivo durante o tempo da condena.

Segundo se recolle na sentenza, o rexedor acordou realizar na contorna da Igrexa de San Bartolomé obras de demolición e levantado do firme de formigón existente no tramo da rúa, saneamento e soterramento das redes de subministración eléctrica e iluminación pública, ou a introdución de arquetas e canalizacións.

Os maxistrados consideran probado que o alcalde de Verín, arquitecto de profesión, promoveu a realización das obras sen presentar o correspondente proxecto técnico e sen contar coa preceptiva autorización da Consellería de Cultura, necesaria ao realizarse os traballos na contorna da zona de protección da Igrexa de San Bartolomé, integrada no catálogo da PXOM de Verín de 2012 e no Catálogo do Patrimonio Cultural de Galicia.

SEOANE DEFENDE A SÚA INOCENCIA

Mentres, Seoane defende a súa inocencia e avanza que recorrerá ante tribunais "ata que prevaleza a verdade", ante a sentenza emitida pola Audiencia Provincial na que se lle condena a dous anos de prisión e á súa inhabilitación por un delito contra a ordenación do territorio.

Así o trasladou Seoane nun comunicado, no que reiterou, ademais, que as obras realizadas na contorna da Igrexa de San Bartolomé eran "de emerxencia, necesarias e urxentes" e, por tanto, "tiñan amparo legal", e defendeu que se realizaron para "garantir a seguridade" e "a mobilidade dos veciños" co "saneamento dun taluz en ruínas", a "retirada de cascallos" e a "reposición dun pavimento danado pola acción das maquinas".

Así mesmo, o rexedor celebrou "enormemente" a absolución do delito de prevaricación administrativa "absolutamente inexistente", e insistiu, tamén, na "inexistencia" do delito contra a ordenación do territorio ao destacar que "só se pode cometer por actuacións non legalizables" e que, neste caso, "non só era legalizable" senón que "conta coa autorización emitida por Patrimonio"