O Partido Popular e a formación independente Camiña Sarria presentaron este sábado o Acordo para o Desenvolvemento Estratéxico de Sarria (ADES), un documento que fixa unha quincena de actuacións consideradas clave para o futuro do municipio lucense.
O pacto, con vixencia ata maio de 2027, inclúe melloras no estadio municipal da Ribela e no CEIP Frei Luís de Granada, a urbanización e cesión das travesías da LU-546 (rúas Matías López e Benigno Quiroga), a reconfiguración da Praza da Vila e a rehabilitación integral da coñecida como Casa do Marqués (Vila Andrea), entre outras actuacións.
O alcalde e presidente de Camiña Sarria, Claudio Garrido, explicou que este acordo supón dar por cumpridos os obxectivos fundacionais da súa formación e, por tanto, "o final do seu ciclo político" ao rematar o mandato. "Non é un pacto de goberno, senón un acordo polo desenvolvemento do municipio", precisou, engadindo que hai "un 99,99%" de posibilidades de que non se presente ás eleccións municipais de 2027.
Na presentación estiveron presentes a secretaria xeral do PPdeG, Paula Prado, a presidenta provincial, Elena Candia, e representantes locais como Carmen José López e Javier Nodal.
Prado subliñou que o obxectivo principal do acordo é "o benestar da veciñanza de Sarria" e destacou o potencial do municipio pola súa situación na Ruta Xacobea. López incidiu en que "quen gaña, por encima de todo, son os veciños", mentres que Candia enxalzou a capacidade do PP para chegar a consensos locais e "defender os intereses dos territorios".
O documento establece como principios básicos a estabilidade institucional, a lealdade entre administracións, a planificación "realista" e a comunicación transparente. Segundo os asinantes, as actuacións recollidas contarán co apoio da Xunta de Galicia e terán impacto a curto, medio e longo prazo.
