Protesta en A Toxa contra a presenza do exprimeiro ministro de Israel

A Coordenadora Galega de Solidariedade coa Palestina anunciou este martes a convocatoria dunha protesta o sábado 4 de outubro na Illa da Toxa, no Grove, coincidindo coa presenza do exprimer ministro israelí Ehud Olmert no ‘Foro A Toja’. A mobilización, que partirá ás 10.30 horas da Rúa Castelao ata o Gran Hotel da Toxa, pretende denunciar a súa invitación ao encontro, que cada ano reúne líderes políticos, empresariais e académicos.

Segundo Ángela Gippini, integrante da organización Galiza por Palestina, convidar a Olmert supón “unha terrible provocación” dado o seu papel na política israelí. Pola súa parte, Óscar Valladares, de Mar de Lumes, subliñou que o obxectivo é facer visible a repulsa, do mesmo modo que ocorreu noutras mobilizacións contra iniciativas percibidas como un “lavado de cara” do réxime de Israel.

Os organizadores lembran que, durante o mandato de Olmert (2006-2009), Israel levou a cabo a operación militar ‘Chumbo Fundido’ en Gaza, entre decembro de 2008 e xaneiro de 2009, que se saldou con arredor de 1.400 palestinos mortos. “Foi responsable, entre outros crimes de guerra, daquela ofensiva”, sinalou Gippini. Tamén o palestino Sami Ashour, da Asociación Galaico-Árabe Jenin, criticou a súa participación no foro, asegurando que “non está a favor de Palestina, senón de preservar os intereses de Israel”.

Ademais, a Coordinadora presentou en Santiago a táboa reivindicativa da mobilización prevista para o domingo 5 de outubro, que espera encher a Praza do Obradoiro. Entre as demandas figuran o cesamento inmediato do fogo en Gaza, a retirada das tropas israelís, a apertura de corredores humanitarios e unha investigación internacional sobre os crimes cometidos. Tamén reclaman á UE, ao Goberno español e á Xunta que rompan as relacións comerciais e diplomáticas con Israel e que se garanta o dereito de autodeterminación de Palestina e o retorno das persoas refuxiadas.