As obras do Centro de Artes Dixitais de Galicia rematarían este ano e sería inaugurado no outono de 2026
A obra licitouse por 4,45 millóns e estase realizando no que ía ser o aparcadoiro subterráneo do edificio da Ópera, edificación que se paralizou en 2013.
Por Europa Press / Redacción | SANTIAGO DE COMPOSTELA | 07/10/2025 | Actualizada ás 13:56
O conselleiro de Cultura, Lingua e Xuventude, José López Campos, avanzou que prevé que as obras do novo Centro de Artes Dixitais de Galicia estean rematadas a finais de ano e agarda que a súa inauguración se poida realizar no outono de 2026. Tal e como destacou durante unha visita guiada polas obras, os traballos atópanse actualmente no 85 % e estímase que as obras da primeira fase estean listas a final de mes. A continuación, levarase a cabo a instalación técnica.
A obra licitouse por 4,45 millóns e estase realizando no que ía ser o aparcadoiro subterráneo do edificio da Ópera, edificación que se paralizou en 2013. Recentemente, o Consello da Xunta aprobou a ampliación do Auditorio Domingo Fontán, por 1,15 millóns, obra que se estima que estea lista para marzo. "Estamos a adaptar un espazo que xa existía e estaba en desuso, os aparcadoiros subterráneos do Teatro da Música, un dos edificios incluídos no proxecto orixinal da Cidade da Cultura, pero que non chegaron a ser totalmente construídos", sinalou López Campos.
En palabras do titular de Cultura, a construción do centro permitirá ter uns espazos polivalentes nos que deseñar unha programación cultural "moito máis específica --do ámbito dixital--, fixa e estable". Ademais, ampliou o conselleiro, outro dos obxectivos é "apoiar aos novos creadores" proporcionándolles "apoio" e "un espazo que funcione como un viveiro de formación de novos talentos".
Segundo explicou o arquitecto Alberto Redondo, a primeira dificultade á que se enfrontaron foi a altura edificio, xa que ao estar deseñado para ser un aparcadoiro tiveron que escavar para conseguir máis altura. Tamén, desenvolveu que o centro contará cun espazo de recepción ou acollida, unha sala de realidade virtual, e un espazo de maior profundidade dedicado a videomapping e exposicións inmersivas. Así mesmo, terá unha zona de laboratorios de traballo para a experimentación dixital e unha área con almacén.
