BNG critica a distribución do FEMPA mentres o PSdeG valora que pode ser "mellorable" fronte ao optimismo da Xunta
O director xeral de Pesca, Acuicultura e Innovación Tecnolóxica, Cándido Rial, repasou as diferentes liñas de axuda que ten activas o departamento autonómico a través deste Fondo
Por E.P. | SANTIAGO DE COMPOSTELA | 08/10/2025 | Actualizada ás 15:00
O director xeral de Pesca, Acuicultura e Innovación Tecnolóxica, Cándido Rial, reivindicou a xestión da Administración autonómica das liñas de axuda ao amparo do Fondo Europeo Marítimo, de Pesca e de Acuicultura (FEMPA), mentres o BNG discrepou sobre a súa "distribución" e o PSdeG veo "mellorable".
Nunha comparecencia este mércores na Comisión 8ª de Pesca e Marisqueo, Rial repasou as diferentes liñas de axuda que ten activas o departamento autonómico a través deste Fondo, algo que Rosana Pérez (BNG) criticou por tratarse dunha información "pública" e recollida no DOG.
Así, o responsable da Consellería destacou que o obxectivo é mobilizar "con eficacia" estes recursos, garantindo que cheguen ao conxunto do sector mar-industria e impulsar un desenvolvemento "en equilibrio e sustentable".
Ademais de detallar numerosas liñas de axudas, Cándido Rial tamén fixo balance, entre outras cousas, da iniciativa Galicia Sabe a Mar e do Bono Peixe, que conclúe a finais deste mes e do que sinalou que quedan 56.000 euros dispoñibles.
"ENSALADA DE CIFRAS"
Tras esta primeira intervención, o parlamentario socialista Carlos López Font, que tachou de "ensalada de cifras" as palabras do director xeral, manifestou que estas axudas "seguro que son mellorables" e pediu buscar "consenso" co sector que, segundo apuntou, "mostrouse desconforme con algunhas convocatorias".
Así mesmo, expuxo que os borradores da Unión Europea propoñen agora "recortes drásticos para este fondo", cunha redución de polo menos o 20% na PAC e "un alarmante 67% dos fondos de pesca". Por iso, defendeu que os socialistas rexeitan esta proposta e encomiou a postura do ministro Luís Planas por considerar "inaceptable a asignación proposta".
Tamén reprochou que Galicia "pode perder grazas á Comisión máis de dereitas da historia, baixo o control do PP". A iso respondeu o deputado do PPdeG Miguel Fidalgo, que acusou ao PSOE de "tentar confundir dicindo que o Comisario Europeo é do PP". "O Goberno de Europa é de populares e socialistas e hai 27 comisarios e só unha española, Teresa Ribeira, casualmente do PSOE", aseverou.
