Por Galicia Confidencial | Baiona | 02/07/2016 | Actualizada ás 12:26
Galicia contará cunha rede de praias sen fume de tabaco, un proxecto pioneiro no Estado das autonomias co que se prohibirá fumar en determinados arenais do noso país. A praia Barbeira de Baiona acolleu este venre o acto de presentación da Rede galega de praias sen fume, iniciativa posta en marcha pola Consellería de Sanidade para promover praias que respecten e coiden o medio ambiente.
Entre as razóns para escoller unha praia sen fume, Sanidade sinala que cada vez que prendemos un pitillo estamos poñendo en risco a nosa saúde e a dos que nos arrodean. Por iso entende que fumar na praia será un paso máis para conseguir unha sociedade sen tabaco.
A Dirección Xeral de Saúde Pública da Consellería de Sanidade lembra que "é responsabilidade de todos contribuír a desnormalizar o consumo do tabaco da nosa sociedade".
"A nosa mocidade ten que ver que o normal é non fumar. A praia é un lugar lúdico para disfrutar da familia, da parella, da natureza, e onde o fume do tabaco non ten cabida, sendo totalmente prescindible", sinálase dende a Xunta, que subliña que esta medida "non ten un fin recadatorio, senón educativo, de promoción da saúde e de proteción do medio ambiente, sendo o seu cumprimento voluntario".
Este proxecto de Praias sen fume é o primeiro destas características que se impulsa nunha comunidade autónoma. "Estamos a falar da elección libre das praias sen fume, sen multas nin vixilancia, sen carácter sancionador", sinalan dende a Xunta. En definitiva, "ademais de mellorar a limpeza dos areais, axudamos a concienciar á xente dun bo hábito de saúde" , dixo o conselleiro Jesús Vázquez Almuiña na presentación desta rede.
Almuiña subliñou que estamos a conseguir importantes avances no obxectivo de que a sociedade galega deixe de fumar. Así, na actualidade, fuma diariamente o 17,6% da cidadanía galega, mentres que esa porcentaxe no conxunto de España é do 24%.
O titular da carteira sanitaria do Executivo galego incidiu en que as cabichas dos pitillos tardan dez anos en degradarse no mar, máis tempo se se acumulan na área, e levan a pegada dos miles de compoñentes químicos que conteñen, tales como a nicotina ou o alcatrán, tamén tóxicos para a vida mariña. Así pois, unha praia sen fume contribúe, tamén, a previr este efecto sobre a nosa fauna.
LISTAXE DE PRAIAS E CONCELLOS SEN FUMES
Ata o de agora, o número de concellos que se sumaron a esta iniciativa son 17, para un total de 22 praias.
Na provincia de Pontevedra, no concello de Baiona, as praias de Barbeira, Frades, Ribeira, Concheira e A Ladeira; en A Guarda, Area Grande; en Marín, Portocelo; en Nigrán, praia das Canas e praia da Madorra; e en Bueu, Area de Bon e Lapamán. Tamén se suma a esta iniciativa o Concello de Cangas, pendente de determinar a praia.
Na provincia de Lugo, no Concello de Barreiros, a praia de Coto; en Foz, A Rapadoira; en Ribadeo, Os Castros-Illas; e en Cervo, O Torno.
Na provincia da Coruña, no concello de A Laracha, a praia de Caión; en Miño, Perbes; en Oleiros, Bastiagueiro; en Ortigueira, Da Concha e Morouzos; en Ribeira, Río Azor; e en Boiro, Barraña. Tamén se suma a esta iniciativa o Concello de Valdoviño, pendente de determinar a praia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.