Soben as mortes en accidentes laborais en Galicia ata agosto, con 43 falecidos, mentres baixan en España
No conxunto do Estado son case 500 os traballadores mortos.
Por Europa Press / Redacción | SANTIAGO DE COMPOSTELA | 13/10/2025 | Actualizada ás 12:34
Un total de 43 traballadores faleceron en accidente laboral en Galicia entre xaneiro e agosto de 2025, o que supón catro mortes máis que nos oitos primeiros meses de 2024 (39), segundo os datos publicados polo Ministerio de Traballo.
Este incremento en Galicia contrasta coa baixada de nove mortes en España, onde houbo 489 accidentes mortais laborais no mesmo período (498 hai un ano). Do total de 43 mortes en Galicia, oito delas producíronse en itínere. Por provincias, os falecementos tiveron lugar en: A Coruña (20), Pontevedra (12), Lugo (8) e Ourense (3).
Galicia rexistrou un total dos 19.462 sinistros laborais con baixa ata agosto, 684 máis que no mesmo período do ano anterior (+3,6%). Entre eles, 19.119 foron leves e 300 foron graves (2,3%). A maior parte dos accidentes mortais do período xaneiro-agosto producíronse por infartos e derrames cerebrais (169), golpes pola caída dun traballador (64), quedar atrapado, ser esmagado ou sufrir unha amputación (54) e accidentes de tráfico (52), entre as principais causas.
BAIXADA NO ESTADO
De acordo cos datos provisionais do Ministerio, os accidentes mortais en xornada de traballo baixaron un 1,5% ata agosto tras rexistrarse 398 falecidos, seis menos que en 2024, mentres que os sinistros 'in itínere' con resultado de morte diminuíron un 3,2%, ata un total de 91 falecidos, tres menos que entre xaneiro e agosto do ano pasado.
Dentro dos accidentes mortais en xornada de traballo, o sector servizos rexistrou o maior número de falecidos, un total de 180, cun descenso do 14,3% fronte a 2024. Tamén recortou a súa cifra de sinistros mortais o sector agrario, onde faleceron 34 traballadores, un menos que ata agosto de 2024.
