O PSOE propón ampliar o voto telemático aos representantes municipais

O Pleno do Congreso dos Deputados decidirá o vindeiro martes se admite a trámite a proposta do PSOE para reformar a Lei de Bases do Réxime Local e permitir o voto telemático dos cargos das entidades locais. O obxectivo é que concelleiros e representantes municipais poidan votar a distancia nas mesmas condicións que os deputados do Congreso, en casos de enfermidade, coidados familiares, falecemento de achegados ou para asistir a sesións doutros órganos, como deputacións ou parlamentos.

Os socialistas lembran que esta fórmula xa se utilizou de maneira provisional durante a pandemia da covid-19, cando se demostrou a súa eficacia para garantir o funcionamento das institucións. Por iso, propoñen estender agora esta modalidade de voto a situacións persoais graves que poidan limitar o exercicio do dereito político, co fin de evitar a paralización de órganos colexiados e favorecer a conciliación familiar.

A reforma pretende modificar o artigo 46 da Lei de Bases do Réxime Local, de modo que os cargos electos poidan votar telematicamente sempre que se atopen en territorio español e acrediten a súa identidade. Entre os supostos incluídos figuran o embarazo, a paternidade ou maternidade, os tratamentos médicos, o coidado de familiares ou persoas dependentes e o falecemento de achegados ata o segundo grao de consanguinidade ou afinidade.

A iniciativa tamén contempla a posibilidade de aplicar o voto remoto en “situacións excepcionais de especial gravidade” que impidan o desempeño das funcións representativas. A solicitude deberá presentarse á Secretaría do ente correspondente, xunto cunha declaración responsable. O alcalde, presidenta ou representante que corresponda fixará o período autorizado e a forma de verificación do voto emitido por vía telemática.