“Fala galego, non sexas lelo”, a nova polémica de Galicia Bilingüe
A entidade que dirixe Gloria Lago critica á dirección dun centro educativo de Panxón e á Xunta por non retirar un cartel que convida aos nenos a falar en galego.
Por Galicia Confidencial | Vigo | 14/09/2016 | Actualizada ás 14:13
“Fala galego, non sexas lelo”. É un cartel que se atopa á entrada dun centro educativo en Panxón e tamén na web do centro. Foi o gañador do concurso de carteis do pasado Día das Letras Galegas e, desde entón, a súa función é tentar reivindicar a necesidade de que os nenos e nenas utilicen este idioma nunha zona onde está en fondo retroceso.
Sen embargo, a Galicia Bilingüe ese cartel non lle gusta, nin que fora o gañador do concurso das letras galegas, nin que se poida ver na entrada do centro. “Non é unha forma sensata e aceptable de promocionar unha lingua, nin de fomentar os valores de tolerancia e respecto que se lles pide aos profesores que inculquen aos seus alumnos”, asegura a súa presidenta, Gloria Lago, nun vídeo sobre este caso.
Galicia Bilingüe xa vai por dúas veces que pediu a súa retirada. Foi a raíz de que o pai dunha nena de Primaria acudira a esta entidade para pedir asesoramento e axuda xa que entende que é “discriminatorio” para os que teñen o español como lingua vehícular.
Por iso, e porque consideran que ese cartel xa non debe de ser retirado, Galicia Bilingüe presentou unha solicitude dirixida ao Inspector Xefe de Pontevedra, Manuel Torres Biscaia, que, polo momento, non obtivo resposta.
De feito, esta asociación critica que este sexa o mesmo inspector ao que lle denunciou “dous claros casos de adoctrinamiento nacionalista no ensino” sen que as súas queixas fosen atendidas e tendo que ir ao Valedor. Por iso, agarda non ter que acudir, novamente ao Valedor, no caso do cartel do centro de Panxón.
