AMP.- Feijóo súbese o soldo un 7,5%, aumenta un 7% os dos seus conselleiros e o Goberno custará máis de 700.000 euros

O presidente da Xunta, Alberto Núñez Feijóo, cobrará un 7,5% máis en 2017, mentres os dez conselleiros que integran o seu Goberno tamén incrementarán en algo máis dun 7% as súas nóminas, de modo que o custo total do Executivo autonómico superará os 700.000 euros.

Así figura no proxecto de presupostos que o titular de Facenda, Valeriano Martínez, entregou este sábado no Parlamento de Galicia, para iniciar a súa tramitación na Cámara.

Segundo recolle Europa Press, o soldo de Feijóo ascenderá o ano que vén a case 73.000 euros. É un 7,5% máis que os en torno a 67.500 que tiña consignados este ano, e un 8,6% máis que a nómina que se fixou en 2013, cando, en plena crise, se reducira o soldo en 7%.

En 2014 e 2015 mantívoo conxelado e en 2016 ascendeu un 1%, como as retribucións do conxunto dos empregados públicos.

Fontes da Xunta destacaron que o incremento do 7,5% responde á recuperación do complemento específico das pagas extraordinarias que se executou en 2013.

Aínda que, de media, a eliminación dese complemento reduciu nun 4% ás retribucións na administración autonómica --media que se recupera en 2017--, esta medida non afectou en igual medida aos empregados públicos, senón que incidiu en función do soldo.

CONSELLEIROS

Así as cousas, pola súa banda, o vicepresidente, Alfonso Rueda, e os outros nove conselleiros --Facenda, Medio Ambiente, Infraestruturas, Economía, Educación, Sanidade, Política Social, Medio Rural e Mar -- teñen asignados case 63.00 euros para o próximo exercicio, un 7,06% máis que este ano.

Entre todos eles, o Goberno de Núñez Feijóo supón algo máis de 707.000 euros en nóminas, un 7% máis que os 660.052 de 2016 --cando o custo subira un 23% fundamentalmente polo aumento do número de consellerías-- .

PERSOAL EVENTUAL DE GABINETE

Mentres, a Xunta segue gastando case 5 millóns de euros (uns 4,98, en concreto) no persoal eventual de gabinete, sobre todo no que depende de Presidencia (1,56 millóns) e Vicepresidencia (máis de 750.000 euros).

Por consellerías, a que máis recibe para estas achegas é Cultura, Educación e Ordenación Universitaria (máis de 490.000 euros), seguida de Economía, Emprego e Industria (uns 395.000 euros).

Pola súa parte, Facenda, Medio Ambiente, Infraestruturas, Sanidade, Política Social, Medio Rural e Mar destinan a persoal eventual de gabinete, cada unha de elas, uns 255.000 euros.

CONTAS E CONSULTIVO

Mentres, o conselleiro maior de contas terá un soldo en 2017 de algo máis de 67.500 euros, que, sumados os trienios, ascende a case 75.500.

Os catro conselleiros deste organismo percibirán un total de 253.730 euros, isto é, que cobrarán uns 63.400 euros cada un, sen contar trienios.

No caso do Consultivo, o seu presidente recibirá 67.500 euros, e o custo das nóminas dos sete conselleiros alcanzará os 444.000 euros (outros 63.500 euros cada un, aproximadamente).