Adeus ao ano Manuel María

Os actos de conmemoración de Manuel María, a quen este ano se lle adicou o Día das Letras Galegas, chegan ao seu fin. Este xoves día 15 ás 20 no Teatro Colón da Coruña clausurarase este intenso ano de actividades.

Será cun concerto, A música amorosa das palabras, no que os versos de Manuel María serán interpretados e musicados por tres grandes da música galega: Uxía, Xabier Díaz e Guillerme Fernández.

A Casa-Museo Manuel María e a Fundación Manuel María de Estudos Galegos están detrás deste acto no que se repasará, a través de vinte pezas, a poética máis diversa de Manuel María, desde os poemas amorosos e máis íntimos até aqueles outros máis comprometidos coa defensa da lingua galega, pasando polos máis irónicos e mesmo polo canto emocionado á súa casa natal de Outeiro de Rei, hoxe convertida en Casa-Museo do escritor. Non faltarán tampouco as adaptacións de poemas, xa cancións emblemáticas, como “O carro” ou “Breve manual para deprender a señorito”.

“O concerto é o broche final a un ano intensísimo, ao tempo que un recoñecemento, por parte da Fundación Manuel María e a Casa-Museo Manuel María ás entidades culturais, veciñais ou deportivas, bibliotecas públicas, centros de ensino e profesorado, xente do teatro, grupos musicais, medios de comunicación e tantísimas persoas que contribuíron de forma decisiva para que a sociedade galega siga percibindo a Manuel María como un intérprete dos soños colectivos das galegas e galegos”, indican os organizadores nun comunicado.