Por X.M. Fernández | Monforte | 21/12/2016 | Actualizada ás 12:00
A escritora vasca Dolores Redondo visita a Ribeira Sacra o 27 de decembro despois de ter contactado con ela hai varias semanas o alcalde de Monforte, José Tomé, para convidala a coñecer a cidade e presentar o seu traballo literario nesta cidade. Aproveitando esta invitación, edicións Xerais, representante en Galicia da Editorial Planeta, organizou a visita e planificou unha serie de actos promocionais da versión galega da obra gañadora do Planeta “Todo esto te daré”.
A primeira parada de Dolores Redondo será ás 12.00 h. da mañá na Casa Grande de Rosende, casa de turismo rural de Sober que sae na portada da obra e que acollerá a presentación á prensa do seu traballo editorial. No acto participará o alcalde de Sober, Luis Fernández Guitián.
Pola tarde, ás 17.30 horas, está prevista unha recepción no despacho da Alcaldía de Monforte onde a escritora asinará no libro de Ouro. Un pouco máis tarde, ás 19.00 horas, terá lugar un acto de presentación da obra no Centro do Viño. O acto está aberto ao público e nel intervirán, ademais da autora: Manuel Bragado, director de Xerais, Román Rodríguez, conselleiro de cultura, e José Tomé Roca. Pechará o acto Dolores Redondo e haberá un coloquio.
A autora, con raíces galegas, ten recoñecido publicamente que a súa avoa tivo moito que ver na súa vocación literaria polas historias que lle contaba, e que se sente engaiolada pola beleza da Ribeira Sacra, motivo polo cal decidiu ambientar a obra nesta fermosa paraxe.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.