Elnosa seguirá en Lourizán grazas aos votos do PPdeG

O PPdeG mostrouse en contra dunha iniciativa do BNG --será votada o mércores en pleno-- que reclama que a Xunta inicie os trámites para o cesamento da actividade de Elnosa en Lourizán, Pontevedra.

No pleno do Parlamento galego, Luís Bará (BNG) alertou de que a empresa química Elnosa desenvolve unha actividade de fabricación de cloro "nociva e perigosa". Así, tamén demandou que non se permita a ampliación da concesión dos terreos de dominio público marítimo terrestre que ocupa na actualidade, ao tempo que pide que a Xunta se dirixa ao Estado para a recuperación do uso público dos terreos.

Así, relatou como agosto de 2017 era a data fixada inicialmente para o cesamento definitivo da produción de cloro líquido en Elnosa e outubro dese mesmo ano para a produción de ácido clohídrico e hipoclorito sódico. Non obstante, censurou que en setembro de 2016 a Xunta ampliou a autorización ambiental a decembro de 2017, mentres recentemente o Goberno galego informaba de negociacións para facilitar a permanencia da empresa en Pontevedra máis alá dese escenario.

Pola súa banda, Marcos Cal (En Marea) recriminou que a prórroga a Elnosa é "outro episodio máis do atentado ambiental" na ría de Pontevedra, á vez que demandou o PP que "defenda o Estado de dereito" e cumpra coas sentenzas que instan á fin da concesión.

Así mesmo, o PSdeG presentou unha emenda con puntos como o que empraza á Xunta a cumprir "estritamente" a normativa no relativo á vertedura cero de contaminantes como o mercurio. O Bloque mostrouse partidario a incluír algunha destas demandas como engadido ou ben que se faga unha votación por puntos.

"FUTURA CANDIDATA DO PP EN PONTEVEDRA"

Ao respecto, Lupe Murillo (PPdeG) xustificou a negativa do seu grupo a esta proposta, dado que a concesión de Elnosa depende do Estado e sinala que a Xunta xa realiza controis para velar pola minimización do seu impacto.

Así mesmo, Murillo pediu "unha posición coherente coa situación actual", pois "non hai unha solución perfecta, pero si unhas mellores que outras". Tamén se mostrou partidaria de "non pechar empresas sen dar alternativas".

Na súa primeira intervención no Parlamento saíu en defensa da empresa "privada", "tratada de forma despectiva moitas veces" nesta Cámara.

"Coherencia neste tema tiveron pouca", replicou Bará, quen acusou de cambio de postura o PPdeG sobre Elnosa, remitíndose mesmo a declaracións de Alberto Núñez Feijóo de 2009. "Elnosa tamén destrúe moitos postos de traballo", sentenciou.

Neste sentido, Bará ironizou con que Lupe Murillo "se está a estrear como futura candidata do PP en Pontevedra", "movendo a cadeira ao seu compañeiro Jacobo Moreira". "Xa me dixo el que está a esperar a que nomeen a algún deputado máis" para conseguir un escano, dixo Bará sobre Moreira.