Cal é a mellor web municipal de Galicia?
Dous estudios diferentes da Universidade de Vigo avalían os portais dos concellos do país. Ambos sitúan dúas cidades nas primeiras posicións. Outras conclusións son que os concellos de Portugal están máis adiantados. En Galicia o goberno electrónico é moi pouco frecuente, malia que en España está regulado e en Portugal non.
Por M.V. | Santiago de Compostela | 08/02/2017 | Actualizada ás 14:00
Pontevedra, Lugo, Santiago, Vigo, A Coruña e Ourense. Estes son, por esta orde, os concellos que responden mellor as preguntas que formulan os cidadáns por Internet.
Así o conclúe o traballo de Vitoria Canoura nun mestrado da Universidade de Vigo. Este traballo final do mestrado en Dirección Pública e Liderado Institucional gañou o premio ao mellor traballo final de mestrado na citadad Universidade.
“Ter un recoñecemento oficial é moi gratificante, recompensa as horas de esforzo”, salienta Canoura do premio a un estudo que abrangueu as sete grandes cidades do país e os concellos de Narón, Lalín, Moaña, Xinzo de Limia, Ribadeo, Meis e A Illa de Arousa.
De todos eles, no furgón de cola da comunicación bidireccional viaxan Meis, Moaña e Xinzo; por non dispor de ferramentas web para a realización destas consultas.
No índice global co que Canoura avaliou os portais públicos, os gañadores son Vigo, cun 54,5% de cumprimento dos ítems propostos, Pontevedra, cun 53%, e Santiago cun 51%.
Polo contrario, na cola da clasificación global viaxan Xinzo co 8% e a A Illa co 16% dos ítems identificados no traballo como definidores dun bo goberno electrónico.
A conclusión global da premiada investigación é que a implantación do goberno electrónico nas administracións locais galegas sofre dun “desenvolvemento moi limitado e pouco uniforme”. A situación tende a ser mellor nas cidades, aínda que tamén hai grandes diferencias entre as urbes.
TRANSPARENCIA
Outro traballo deste ano realizado por investigadores da Facultade de Ciencias Sociais e da Comunicación tamén situaba a Pontevedra e Santiago como dúas das cidades con mellores webs. No caso do artigo Xabier Martínez Rolán, Xosé Baamonde e Teresa Piñeiro, que se centraba na transparencia da información, estas dúas cidades estaban no ‘top ten’ dos 44 portais avaliados, procedentes de Galicia e do Norte de Portugal.
Nese ranking de 44 había outros tres que ocupaban unha posición media: Ferrol - posto 11-, Vigo -16- e A Coruña -20. Máis problemas había no caso de Ourense (posto 31), Lugo (35), Narón (37), Oleiros (38), Vilagarcía de Arousa (39), Carballo (43) e Arteixo (44).
A conclusión xeral deste segundo estudio era que as administracións lusas usan máis e mellor as redes sociais e están "máis concienciadas" da importancia da transparencia e da rendición de contas á cidadanía que os municipios galegos a pesar de non ter un regulamento xurídico, como si ocorre neste Estado dende 2013.
