Un estudo sitúa o atún claro Calvo lixeiro entre as 10 innovacións en alimentación máis exitosas de 2016

O estudo 'Radar da Innovación 2016' de Kantar Worldpanel sitúa o atún claro Calvo lixeiro entre as dez innovacións en alimentación "máis exitosas" lanzadas en España no ano 2016.

Así o explicou este venres Calvo nun comunicado de prensa, no que destaca que "de entre os máis de 130 novos produtos lanzados ao mercado o pasado ano por distintas marcas de fabricante e distribuidor, e de categorías tan variadas como alimentación, bebidas e perfumaría e drogaría, o atún claro Calvo lixeiro é a única conserva de peixe presente no Top 10 de innovacións".

"Co atún claro Calvo lixeiro, a compañía adaptouse á crecente demanda nos fogares de alimentos saudables e prácticos, dando lugar a unha nova categoría nas conservas de peixe e ofrecendo aos consumidores o primeiro atún claro coa metade de graxa, o mesmo sabor e todos os beneficios nutricionais deste tipo de peixe", segundo explica a compañía.

Deste xeito, Grupo Calvo subliña que ve así "recoñecida unha aposta pola innovación que foi un alicerce estratéxico na evolución e o crecemento da compañía".

"Desde hai máis de 75 anos, o Grupo entendeu a innovación como unha ferramenta para seguir superando as expectativas dos seus clientes e a súa confianza nas súas marcas como referentes de alimentación saudable e de calidade", sentenciou.