Por Galicia Confidencial | Santiago de Compostela | 04/09/2017 | Actualizada ás 14:35
O curso escolar comezará nos vindeiros días con maior peso do ensino privado concertado. En concreto, segundo datos desvelados hoxe por Comisións Obreiras, pérdense 47 novas aulas públicas de infantil, mentres que a Xunta autorizou -e subvencionará- 63 novas aulas en centros concertados, incluídos os que segregan aos cativos en función do seu sexo.
“Queremos denunciar o aumento dos concertos educativos, sobre todo nos centros que segregan ao alumnado. Peñaredonda, Montespiño e Montecastelo aumentan 1 unidade de Ensinanza Primaria cada un deles”, indicaron en rolda de prensa esta mañá en Santiago.
Luz López, responsábel de CC.OO. Ensino, alertou hoxe que a Consellería de Educación está a negar solicitudes de centros públicos para abrir novas aulas e polo contrario, asegura que a Xunta dálle luz verde a todas as solicitudes de apertura de aulas de por parte de centros privados, pagados con diñeiro público. Esta problemática sucede, segundo a central, sobre todo en FP onde “concertan en FP 18 ciclos de grao medio, 15 ciclos de grao superior e 19 de FPB a maiores dos xa existentes”.
A central engade que a Administración facilita cada vez máis as cousas as escolas privadas. Como exemplo, apunta que os convenios polo que diñeiro público sufraga o ensino concertado tiñan antes unha duración de catro anos, e agora o Goberno do PPdeG aumentounos a seis.
RESPOSTA DA XUNTA
O conselleiro de Educación, Román Rodríguez, tivo que abordar esta problemática nunha rolda de prensa posterior. Durante a presentación do transporte escolar, o mandatario tentou quitarlle ferro ao asunto argumentando que “é normal que o número de aulas varíe”. Di que sucede “todos os anos”.
Na súa opinión, isto débese exclusivamente, aos cambios naturais da demanda nas diferentes localidades, tanto na pública como na privada. “O mapa escolar é un mapa escolar vivo e responde as necesidades e demanda da sociedade”, argumentou este mediodía en Santiago.
Segundo o detallado análise de Comisións, en total hai hai 42 unidades menos de Infantil e Primaria para este curso.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.