Por gcdeportes | Marín | 13/09/2017 | Actualizada ás 09:52
Unha categoría por debaixo da que en xustiza lle correspondería. O CB Marín Peixegalego xogará a vindeira campaña a liga EBA, tras ter presentada a documentación pertinente e ter sido inscrito pola Federación Española de Baloncesto, a mesma que a principios de verán rexeitou a súa inscrición na LEB Prata por supostos “defectos formais” no aval bancario.
Malia a decisión “moi sopesada” de saír a competir na EBA (“parar un ano sería mortal”, din dende o club), o Marín PXG segue adiante co seu recurso na Audiencia Nacional para reclamar a praza que lle corresponde, tralo descenso o ano pasado de LEB Ouro, na LEB Prata.
A resolución do CSD de principios de mes, que recoñecía o dereito de Chantada a inscribirse na Conferencia A da EBA, obrigou á FEB a ampliar e reorganizar a competición, e retrasar o arrinque ata o 8 de outubro. “En una muestra más de la actitud, imprevisible y arbitraria de la Comisión Delegada, ha decidido ampliar la Conferencia A en cuatro equipos, para formar dos grupos de 16. No deja de ser curioso, que todos los equipos en pleitos con la FEB, están o estarían encuadrados en este grupo A, un hecho que no pasa desapercibido”, apunta o Marín PXG no comunicado no que anunciou a súa inscrición na EBA.
Marín PXG critica que a ampliación implica un aumento de custos nos desprazamentos e o incremento das xornadas fai difícil cadrar un “xa de por si cargado calendario”, un feito determinante para rexeitar a ampliación da LEB Prata pero si executado na Liga EBA, onde aínda é máis difícil “encaixar os orzamentos”.
A proposta inicial da FEB é incluír a Marín na conferencia A , grupo B, onde deste xeito habería ata dez equipos galegos: CB Chantada, Rosalía de Castro, Santo Domingo Betanzos, Baloncesto Narón, Estudiantes Lugo, Marín Peixegalego, CB Culleredo e os filiais de Obradoiro, Básquet Coruña e COB, ademáis de Xixón, Ponferrada, León, Venta de Baños, Carbajosa e Zamora. A Liga EBA (Liga Española de Baloncesto Amateur), organizada pola FEB, dispútase de xeito simultáneo en cinco conferencias (A, B, C, D e E), onde se integran os equipos por cercanía xeográfica.
Na Liga EBA, Marín atoparase con xogadores galegos que son vellos coñecicos do club, como o pivote Antonio Pantín, que volve ás pistas tras fichar polo Rosalía, ou Mario Cabanas, fichaxe estrela do CB Culleredo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.