Por E.P. | LUGO | 13/10/2017 | Actualizada ás 13:16
Mediados de outubro e Galicia arde por todos os recunchos. Son xa quince os grandes lumes que hai en todo o país. E un deles, declarado ás 7,27 horas do mércores na parroquia de Meiraos no municipio de Folgoso do Courel (Lugo) afecta a zona de Rede Natura de "alto valor ecolóxico".
Así o confirmaron a Europa Press fontes da Consellería do Medio Rural e a alcaldesa de Folgoso do Courel, Dolores Castro Ochoa, quen recalcou que "o 96 por cento" do municipio está dentro de Rede Natura.A rexedora subliñou que este lume foi "provocado descaradamente" e lembrou que a zona xa ardera en 2013 "e volveron prender outra vez", lamentou.
Aínda que sinalou que non hai risco para vivendas nin núcleos poboados, a alcaldesa explicou que ardeu, sobre todo, zona de monte raso incluída en Rede Natura, que ten "un alto valor ecolóxico". "Se chove esperamos que se recupere pronto todo", concluíu.
Segundo os datos difundidos por Medio Rural, este lume comezou ás 7,27 horas do mércores e está perimetrado. As estimacións provisionais sitúan a superficie queimada nunhas 150 hectáreas.Para controlar este lume mobilizáronse un técnico, seis axentes, 34 brigadas, 13 motobombas, seis pas, nove helicópteros e tres avións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.