Por Galicia Confidencial | Compostela | 15/10/2017 | Actualizada ás 20:25
Portugal ten parte da culpa dos lumes que afectan a Galicia. Iso foi o que veu a dicir o presidente da Xunta, Alberto Núñez Feijóo, que explicou este domingo pola tarde, que a vaga de incendios que arrasa Galicia débese aos incendiarios, ás condicións climatolóxicas adversas e aos lumes que entran a Galicia desde Portugal.
Trátase da "actividade incendiaria homicida"; dos efectos climatolóxicos "máis adversos posibles", cunha seca "continuada" e ventos "cada vez máis intensos"; e dos lumes que chegan a Galicia desde Portugal, que conseguiron traspasar o río Miño. Con todo, a maior parte dos grandes incendios foron provocados, moi posiblemente por terroristas inendiarios, pero en territorio galego, especialmente, todos os da área metropolitana de Vigo.
O máximo mandatario do Goberno galego estivo seguindo no centro de coordinación central de Santiago a evolución dos incendios. Neste sentido, Feijóo --quen estivo acompañado polo delegado do Goberno en Galicia, polo tenente coronel da Unidade Militar de Emerxencias e polo director xeral de Ordenación Forestal-- sinalou que se están atacando tres grandes riscos.
"Están a xogar con vidas", avisou o presidente da Xunta en relación aos incendiarios, para logo admitir que, aínda que se está traballando sen tregua, a situación é "preocupante". Así mesmo, pediulle aos cidadáns que estean atentos dos avisos e que se teñen algunha dúbida vaian a lugares seguros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.