O uso do Youtube como xeito de espallar e aprender galego

A segunda edición dos premios Youtubeir@s busca incrementar a presenza do noso idioma na Internet.

Por E.P. | SANTIAGO DE COMPOSTELA | 30/11/2017 | Actualizada ás 17:47

Comparte esta noticia

A segunda edición dos premios Youtubeir@s busca incrementar "a presenza do galego" nos vídeos desta rede social, a máis grande do mercado global, así como crear "referentes en galego" dun tipo de axentes que teñen "gran repercusión social" no mundo dixital, como son os youtubers.

Imaxe promocional do concurso Youtubeiros
Imaxe promocional do concurso Youtubeiros | Fonte: youtubeiras.gal

A iniciativa presentada este xoves está promovida polos servizos de normalización lingüística do tres universidades galegas (Santiago, A Coruña e Vigo), da Deputación da Coruña, así como de nove concellos galegos como os de Carballo, Pontevedra ou Santiago.

Segundo explicou a Universidade de Santiago de Compostela (USC) nun comunicado, outra das finalidades do evento é reforzar "a creatividade" grazas á presentación de "temas propios" dos participantes. O certame outorgará un total de 5.500 euros repartidos entre o seis categorías temáticas que o compoñen.

BASES DO CERTAME

Neste sentido, a universidade apuntou que "o número de categorías este ano increméntase con respecto á pasada edición". Así, a convocatoria recolle distintos apartados temáticos como canle, creatividade, eficacia comunicativa, calidade técnica ou calidade lingüística.

Presentación da iniciativa Youtubeir@s
Presentación da iniciativa Youtubeir@s | Fonte: Europa Press

No certame poderán participar todas as persoas maiores de 14 anos que presenten "vídeos de opinión" ou "videotutoriais autoproducidos" en galego. Os vídeos deben estar publicados "con data posterior ao 28 de abril de 2017", sen restricións de privacidade e baixo as etiquetas '#youtubeiras' e '#youtubeiros' na súa descrición, tal e como indicaron desde a universidade.

PREMIO DO PÚBLICO

Outra das novidades desta segunda convocatoria é o apartado 'Premio do público'. Nesta modalidade, a USC explicou que "os usuarios da rede social Facebook" poderán "propor un vídeo do que sexan seguidores", a través de "un comentario no perfil de Youtubeir@s", acompañado da etiqueta '#propostayoutubeira'. Estas suxestións tamén deberán adecuarse ás bases do certame.

DIVULGACIÓN DA INICIATIVA

A USC informou, ademais, de que Youtubeir@s "estará presente en eventos culturais galegos", como en Culturgal (feira das industrias culturais galegas). Vinculado ao acto, este sábado en Espazo Foro realizarase "unha presentación pública do certame" que contará con "unha conversación con youtubers".

Así mesmo, Youtubeir@s tamén se anunciará en "festivais relacionados coa creación audiovisual e dixital" en lingua galega, para tratar de "crear sinerxías coa programación de contidos youtubers".

Temas: GALEGO YOUTUBE
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta