Por X.M. Fernández | Monforte | 15/12/2017 | Actualizada ás 10:00
A primeira Feira Medieval de Monforte tivo lugar no ano 2003 e daquela as actividades relacionadas co evento realizábanse no transcurso dun só día. Co aumento de visitantes, e vendo os bos resultados económicos para a cidade, a feira pasou a ser dous días no 2014 coincidindo co mandato de Severino Rodríguez.
En palabras do actual alcalde, José Tomé Roca, o crecemento deste evento foi exponencial, tanto dende o punto de vista comercial como dende o punto de vista da repercusión turística para Monforte e contorna. O mandatario local fai a comparativa de que no 2014 pasaron pola Feira Medieval uns 15.000 visitantes e este ano 2017 calcúlase que pasaron uns 30.000. En rolda de prensa algúns medios amosaron certo escepticismo pero o Sr. Tomé reafirmouse nos datos ofrecidos.
Este ano cumpríronse quince anos do evento, feito que fai posible a petición de Festa de Interese Turístico de Galicia, e o goberno local non quere perder esta oportunidade. Así, pois, comprométense a iniciar os trámites pertinentes diante da Xunta de Galicia pero antes queren levar ao Pleno do vindeiro luns esta decisión previa da Xunta de Goberno.
Tomé Roca aproveitou a rolda de prensa para anunciar esta acción de goberno afirmando tamén que Monforte e a súa Feira Medieval reunían todos os requisitos esixidos, que a documentación precisa para o trámite estaba practicamente preparada e que a obtención desta distinción sería moi beneficiosa para a cidade e para o conxunto da Ribeira Sacra pois economicamente ten repercusión a moitos quilómetros á redonda.
Non podendo concretar prazos, e á espera da decisión do Pleno do luns, igual se dá a posibilidade de que no 2018 a Feira Medieval estree o devandito recoñecemento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.