Por Galicia Confidencial | Ames | 16/01/2018 | Actualizada ás 10:00
“As pegadas de Rosalía”. Así se chama a nova oferta cultural que os concellos de Ames, Brión e Padrón presentarán en Fitur. Trátase dun itinerario cultural que toma como referencia a ruta deseñada polo intelectual Avelino Abuín de Tembra e está concibido para que as usuarias e usuarios poidan percorrelo en autobús, a pé ou en bicicleta.
O itinerario pasa por lugares como San Xoán de Ortoño (Ames), a igrexa de Bastavales (Brión), a colexiata de Iria Flavia (Padrón), o Pazo de Arretén (Padrón) e a Casa de Rosalía de Castro (Padrón).
"As pegadas de Rosalía é un novo produto turístico e cultural que responde ás actuais demandas das viaxeiras e viaxeiros, como son a busca de inmersión en destino, o respecto á identidade do territorio, o contacto coa poboación local ou a protección do medio ambiente, entre outras”, apuntan desde Ames.
Os rexedores dos tres concellos implicados nesta iniciativa agradecen a colaboración prestada durante o proceso de creación desta ruta por parte de Xosé Vizoso, autor do deseño da portada do material promocional, e por parte do presidente da Fundación Rosalía de Castro, Anxo Angueira.
Non é a primeira vez que a poetisa de Patrón inspira a outros sectores que non son culturais. Hai uns meses a compañía aérea Norwegian tamén lle puxo o nome de Rosalía de Castro a un dos seus avións para impulsar a “defensa da cultura e da lingua” de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.