As vítimas do Alvia esixen a Pastor que active a comisión de investigación pendente desde setembro
Piden unha reunión coa entón ministra de Fomento para entregarlle "información sensible" sobre o accidente.
Por E.P. | SANTIAGO DE COMPOSTELA | 05/02/2018 | Actualizada ás 13:10
A plataforma de vítimas do Alvia accidentado no barrio compostelán de Angrois en xullo de 2013 rexistrou este luns no Congreso unha carta dirixida á presidenta da Cámara, Ana Pastor, urxíndolle a constituír xa a comisión de investigación sobre o sinistro que o pleno acordou crear o pasado 28 de setembro.
O presidente da asociación, Jesús Domínguez, remitiu unha misiva similar, coa mesma petición, ao resto de membros da Mesa do Congreso. Na que os afectados dirixen a Pastor tamén lle solicitan unha reunión con ela para que lles explique en persona os motivos polos que, catro meses despois de acordarse polo pleno, non se iniciou e os grupos nin sequera pactaron quen integrará a mesa da comisión.
Ese acordo sobre a Presidencia e o resto de membros é o primeiro paso para poder constituír a comisión, pero até a data os grupos parlamentarios foron incapaces de articular unha proposta. PP e PSOE pensaran en que a presidise un membro de Cidadáns, pero ante a súa negativa, tentárono primeiro co PNV e despois co deputado de Foro Asturias, Isidro Martínez Oblanca. Até a data, ninguén quixo asumir esta tarefa.
Nas súas cartas, as vítimas contrastan o atraso no arranque desta investigación --sobre un accidente que custou a vida a 80 persoas e no que 144 resultaron feridas-- coa celeridade coa que, ao seu xuízo, botou a andar a nova comisión de avaliación e modernización do estado autonómico, que tivo a súa primeira reunión só dous meses despois de que o pleno dese o visto e prace á súa creación.
A EXMINISTRA, A PRIMEIRA INTERESADA
Na misiva a Pastor, que era ministra de Fomento cando tivo lugar o descarrilamento, as vítimas avánzanlle que queren vela para facerlle entrega de certa "información sensible e relevante" para que a faga chegar "ao xuíz ou a quen considere oportuno".
E é que, no seu texto, reproducen varias declaracións que fixo Pastor no seu momento e recalcan que están convencidos de que ela "é a primeira interesada" en que se aclaren determinados aspectos do sinistro aos que, subliñan, "comprometeuse" en agosto de 2013.
Neste sentido, pregúntanse como é posible que, mentres Pastor aseguraba que os técnicos de Adif e de Renfe estaban "a colaborar permanentemente" co xulgado que leva o caso, os dous instrutores apercibiron a estas dúas empresas dependentes de Fomento precisamente pola súa "falta de colaboración coa xustiza".
"NON ENGADA MÁIS DOR"
Tamén engaden que a Axencia Ferroviaria Europea concluíu "nun durísimo informe" que a investigación que fixo a comisión de investigación de accidentes ferroviarios (CIAF) "non foi independente" e que non se abordaron "as causas raíz" do sinistro, en concreto as que afectan a Adif e Renfe. E todo iso, relatan, despois de que Pastor resaltase a "total independencia" dese organismo, adscrito ao seu ministerio.
"Claro que hai que chegar a que se saiba toda a verdade, e todos temos un papel niso", asegurou Pastor no seu día, segundo lémbralle a asociación de afectados na carta. Por iso a agora presidenta do Congreso pediu que se lle fixese chegar calquera información que axudase a esclarecer o sucedido. Agora, as vítimas tómanlle a palabra e queren entregarlle esa "información sensible".
"Non engada máis dor e sufrimento a todos os que estamos a esperar que cumpra co seu deber, a súa obrigación e as súas esperanzadoras palabras", conclúe a misiva.
