Por Xurxo Salgado | Compostela | 15/02/2018 | Actualizada ás 15:16
A táctica da Xunta na folga da Xustiza comeza a estar clara e é a mesma que xa mantivo noutros conflitos semellantes, como a folga do transporte. Agarda que sexa a presión social –coa axuda dalgúns medios de comunicación-- a que obrigue a ceder ao conxunto dos traballadores da Xustiza que reclaman un incremento salarial que os equipare co conxunto dos traballadores do resto do estado.
“Non representan á maioría dos traballadores”, dixo este xoves o presidente da Xunta en alusión aos negociadores e funcionarios da Xustiza apuntando xa directamente un dos argumentos que comeza a circular: que os funcionarios deste sector son uns “privilexiados” con respecto a outros funcionarios e ao común dos traballadores. Por iso, durante estes días, empregados do sector da xustiza xa denunciaban a “manipulación” de información que pretende facer a Xunta e que están “comprando” determinados medios de comunicación.
“A proposta da Xunta é moi razoable”, insistiu Feijóo na rolda de prensa posterior ao Consello da Xunta ao incidir en que cobrar 1.000 euros máis ao ano é “moi sensato” e sitúa a estes funcionarios “por riba da media dos traballadores do resto das autonomías”. Uns argumentos que desbotan os sindicatos que acusan a Xunta de “mentir”, xa que o incremento do resto das autonomías é maior, e porque só circunscribe ás negociacións a unha cuestión económica, cando enriba da mesa, din, están outros puntos como a conciliación laboral, a falla de medios para desenvolver o seu traballo ou a gran carga de traballo que soportan sen que haxa máis persoal.
“Non creo que o resto dos traballadores públicos ou a xente que está no paro considere que cobrar 1.000 euros máis ao ano sexa ridículo”, repetiu o presidente galego para tentar vender que o problema da folga da Xustiza é unha cuestión só salarial. “Está claro que non representan o sentir maioritario dos traballadores”, indicou, “porque este acordo que propomos o asinaría a maioría dos traballadores publicos”.
NEGOCIACIÓNS
Asemade, e preguntado polas negociacións, que o Goberno galego quere que leven cargos menores, Feijóo dixo que “seguen abertos” pero que non van cambiar a súa proposta. De feito, os sindicatos piden poder negociar directamente con Feijóo e, senón, con conselleiros como Rueda ou Valeriano Martínez, pero o presidente galego, deu a entender que, polo momento, no acepta esta posibilidade nunha nova estratexia por tentar ningunear aos representantes sindicais.
Por iso, tamén descartou a presenza de mediadores externos proque, insisitu, ao tratarse dun problema salarial e laboral con traballadores públicos ten que solucionarse na Xunta. “Non se pode negociar con intermedirios. Temos que negociar directamente cos sindicatos porque non sería xusto meter a persoas alleas nesta cuestión”, limitouse a responder.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.