A Xunta insiste na "intencionalidade" da vaga de lumes e a oposición repróchalle a súa "irresponsabilidade"

A directora xeral de Patrimonio Natural, Ana María Díaz, insistiu este xoves na "intencionalidade" da vaga de incendios de outubro, no que considera un "ataque feroz e indiscriminado" contra Galicia.

Na comisión de estudo de incendios do Parlamento galego, esta alto cargo da Xunta subliñou que "a intencionalidade dos que provocaron aqueles lumes non deixa lugar a ningún tipo de dúbidas", xa que "polo menos tres de cada catro" incendios "producíronse non por causas naturais, senón cunha intencionalidade detrás".

Así, asegura que os incendiarios "atoparon o escenario perfecto para poder actuar" con "a regra do 30-30-30", é dicir, temperaturas por encima dos 30 graos, ventos superiores aos 30 quilómetros por hora e unha humidade relativa inferior ao 30%.

Estas palabras provocaron reproches de toda a oposición. Patricia Vilán (PSdeG) censurou á Xunta que "falar de intencionalidade sen ter datos de que os incendios son intencionados é unha irresponsabilidade política".

Nesta liña, Paula Quinteiro (En Marea) acusou ao Goberno galego de "limitar o relato" aos "incendiarios" e de "utilizar esta comisión para seguir incidindo" en que houbo un "ataque masivo", que "xa foi cuestionado" --en alusión ao informe que ultima Fiscalía no que se descarta a existencia dunha trama incendiaria--, co fin de eludir responsabilidades.

"Non hai mellor defensa que un bo ataque, e vostede vén con ímpeto", queixouse Xosé Luís Rivas, Mini (BNG), sobre as palabras de Ana María Díaz. Critica que a Xunta "reduce a causalidade dos incendios aos incendiarios", pero "o combustible estaba aí" e "o monte metido nas casas" polo "caos urbanístico", e iso "é responsabilidade de vostedes".

Con todo, o deputado popular José González preguntouse se "alguén dubida da intencionalidade dos incendios". "Non podemos pensar que é todo culpa da Xunta ou do partido que está no goberno", xustificou.

NON "DEMONIZAR" ESPECIES

Durante a súa intervención, a responsable de Patrimonio Natural tamén pediu "non demonizar especies", senón establecer "as condicións" para que esas plantacións estean correctamente coidadas e "non estean preto das casas".

Neste sentido, defendeu as políticas da Xunta e que após as medidas postas en marcha Galicia "vai estar máis preparada" contra os lumes.

DANOS NOS ANCARES E Ou XURÉS

Na sesión desta mañá da comisión de incendios --que prosegue pola tarde-- tamén interveu previamente o xefe de servizo de Parques Naturais, Alberto Otero, quen cifrou nunhas 5.800 hectáreas queimadas a afectación polos lumes en espazos protexidos de O Xurés e Os Ancares na vaga de lumes.

En concreto, os incendios arrasaron case un terzo do parque natural dos Ancares, xa que arderon 2.490 hectáreas das 7.792 coas que conta, o 32% do total, nos dous lumes declarados en outubro.

O 50% do ardido foron matogueiras, mentres o 30% (unhas 750 hectáreas) foron árbores frondosas e o 20% restante correspóndese con pastos.

No caso de O Xurés, queimáronse 3.323 hectáreas en catro incendios en outubro, o que se traduce no 11% das 30.000 hectáreas do espazo protexido.

Neste caso, o 79% do queimado correspóndese con matogueiras e medio rochoso, mentres o 10% foron piñeiros de repoboación, o 5% frondosas como carballos e o 5% restante trátase de prados e cultivos.

Deste xeito, o 23,14% das 49.000 hectáreas queimadas na vaga de lumes foi en Rede Natura, segundo os datos que ofreceu posteriormente Ana María Díaz.

ESPERAR A PRIMAVERA PARA COÑECER A REXENERACIÓN

Segundo explicou o responsable dos parques naturais, os máis afectados os lumes foron as matogueiras --como poden ser acivros e brezos--, que teñen "gran capacidade de rebrote" e "recuperan con moitísima facilidade", "co que é de esperar que co tempo cubran o terreo de novo". En cambio, os bosques con especies como carballos tiveron "danos máis leves".

Por iso, chama a esperar a primavera para ver como evoluciona a capacidade de rexeneración dos hábitats e aplicar "medidas correctoras cando a recuperación non sexa a esperada".

Con todo, avoga por recepar e plantar especies resistentes ao lume para aumentar a biodiversidade. Ademais, puxo en valor o traballo "eficaz" realizado para evitar arrastres coa colocación de palla.

No tocante á fauna, indica que non hai constancia de afectación a grandes mamíferos e aves, aínda que cre que houbo un dano "importante" para réptiles, insectos, pequenos mamíferos e anfibios.

Sobre este extremo, Patricia Vilán (PSdeG) dixo que lle preocupa "moito" que catro meses despois dos incendios "aínda non se sabe nada" da fauna afectada e que a Xunta non teña datos que ofrecer sobre esta cuestión.