Rueda avisa que se os sindicatos piden "cifras inasumibles" o acordo "vai ser imposible"
Avanza a creación dun plan especial para recuperar o traballo perdido nos xulgados por culpa da folga que arrincou o 7 de febreiro.
Por E.P. | SANTIAGO DE COMPOSTELA | 18/03/2018 | Actualizada ás 18:25
O vicepresiente da Xunta, Alfonso Rueda, mostrou a súa confianza en que este luns, cando se retoman as negociacións para desbloquear o conflito de xustiza, se poña fin a unha folga que paraliza desde fai máis dun mes os xulgados galegos; aínda que avisou que se os sindicatos seguen pedindo "cifras absolutamente inasumibles" o acordo entre as partes "vai ser imposible".
Nunha entrevista este domingo na Radio Galega, o número dous do Goberno galego e conselleiro de Presidencia, Administracións Públicas e Xustiza expresou que a Xunta sentará a negociar "con ánimo de chegar a un acordo" e lembrou que a última oferta presentada aos sindicatos "hai que pola en valor" porque, segundo Rueda, situaría os salarios dos funcionarios galegos por encima da media estatal.
Logo de insistir en que desbloquear a situación é "cada vez máis" necesario, Rueda advertiu que se a actitude dos sindicatos segue sendo "ir á cifra máis alta ou pór cifras absolutamente inasumibles" o acordo "vai ser imposible". "Cando se nos piden cifras que está fóra de toda responsabilidade e toda obxectividade, aí vai ser imposible, nin con Rueda nin sen Rueda", remarcou, para logo apuntar que "non queda moito máis marxe" de mellora dos salarios por parte da administración.
PLAN PARA RETOMAR TRABALLO
Así mesmo, volveu a sinalar que os cidadáns son "reféns" da situación e incidiu en que "os efectos" da folga son "malos e cada día que pasa máis". Nesta liña, Rueda asegurou que hai servizos básicos que os cidadáns "deberían estar a recibir" a pesar da folga e non poden facelo, como as inscricións nos rexistros. Ademais, avanzou que a Xunta estuda articular un plan para a recuperación do traballo que se deixou de facer durante o case mes e medio desde o inicio da folga. "Na medida do posible haberá que recuperalo, haberá que facer un plan", recoñeceu o número dous do Executivo autonómico que non precisou en que consistiría esta medida.
PENSIÓNS E MUNICIPAIS DE 2019
Rueda tamén foi cuestionado polas mobilizacións dos pensionistas. "Non lle vou a ocultar que nos preocupan esas mobilizacións, son numerosas", recoñeceu. Cre que existe "decidido vontade" por parte do Goberno central para atender as reivindicacións dos pensionistas, que ve "xustas".
Para o tamén presidente provincial do PP de Pontevedra, é preciso que os populares afronten as eleccións locais do próximo ano con "canto máis tempo mellor". Deste xeito, sinalou que "un ano sería un prazo razoable" para a elección dos candidatos porque "mentres non hai candidatos non hai programas".Rueda tamén fixo referencia á intención de Cidadáns de captar ao exconselleiro de Industria Javier Guerra para ser a súa cabeza de lista na cidade de Vigo o próximo ano. "Javier Guerra é o PP, sente do PP", comentou Rueda, que afirmou que ten "bastante confianza na coherencia" de quen tentou liderar o PP vigués e caeu derrotado pola actual presidenta local, Elena Muñoz.
