SANTIAGO DE COMPOSTELA | 28/05/2018 | Actualizada ás 09:55 por EUROPA PRESS
Un home resultou ferido nun accidente de tráfico rexistrado na mañá deste luns após saírse da vía o vehículo que conducía e chocar contra un poste de telefonía no termo municipal de Ordes (A Coruña).
Segundo informou o 112 Galicia, o sinistro ocorreu sobre as 7,45 horas deste luns cando o condutor circulaba co seu vehículo pola estrada que une Ordes e Cerceda.
Após o aviso dun particular, que indicou que se tratou dunha saída de vía co condutor ferido e accesible, os Bombeiros de Ordes, despois de ser informados polo 112, desprazáronse até o lugar para prestar colaboración, ao tratarse dunha zona con moi pouca visibilidade.
De igual maneira, por parte do 112 Galicia requiriuse a intervención do persoal sanitario do 061, dos axentes de Tráfico, da Policía Local e a de efectivos de Protección Civil.
Unha vez no punto, os Bombeiros confirmaron que a persona estaba accesible no interior do vehículo, pero foi necesario o uso do material de excarceración para poder evacuala.
Ademais, relataron que, debido ao impacto, o poste de telefonía partiu pola metade e quedou suxeito polos cables de alta tensión. Por iso, solicitouse tamén a intervención do persoal do servizo de mantemento da estrada e da compañía de telefonía.
Mentres, o 061 enviou unha ambulancia asistencial que, concretaron a Europa Press fontes sanitarias, levou ao ferido, R.J.P.N., de 27 anos, ao Hospital Quirónsalud na Coruña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.