Por E.P. | SANTIAGO DE COMPOSTELA | 04/06/2018 | Actualizada ás 15:00
O portavoz de En Marea, Luís Villares, instou ao presidente autonómico, Alberto Núñez Feijóo, a que "aclare pronto" se quere suceder a Mariano Rajoy á fronte da dirección nacional do PP. "Agora ten a oportunidade. Que marche pronto e que nos deixe gobernar en favor do ben común", apostilou.
Así se pronunciou este luns Luís Villares a preguntas dos xornalistas sobre o hipotético salto á política estatal de Núñez Feijóo, ao que acusa de empregar como "trampolín" a Presidencia da Xunta para "tirarse a esa piscina sen auga que é o PP neste momento". "Se un político utiliza unha institución como trampolín está a facer un uso espurio, porque non están para iso", aseverou o portavoz rupturista, que estendeu esta crítica aos conselleiros José Manuel Rey Varela e Beatriz Mato, que se perfilan como candidatos do PP para as alcaldías de Ferrol e A Coruña, respectivamente.
Así as cousas, Villares asegura que Feijóo "nunca quixo ser candidato á Xunta", e pide que "se aclare canto antes para que en Galicia se empezo a gobernar". "Que marche para Madrid a facer oposición pareceríanos positivo, estariamos dispostos a mandalo cun lacito", apostilou.
PETICIÓNS AO GOBERNO
Doutra banda, o portavoz de En Marea emprazou a "coñecer" o equipo de Goberno que acompañará a Pedro Sánchez para efectuar peticións concretas, aínda que indicou que o partido instrumental reclama que se debe abandonar o "ninguneo sistematizado ao que o PP someteu a Galicia".
Deste xeito, instou ao novo Goberno socialista a articular un sistema de financiamento autonómico "adecuado e xusto", dotar a Galicia de "capacidade política propia" e aplicar "medidas de carácter efectivo para frear a sangría demográfica e a emigración". A continuación, tamén puxo o foco na importancia en "avanzar cara a unha reforma do modelo de Estado que recoñeza o carácter nacional de Galicia" e que a comunidade galega "recupere competencias".
REFORMA LABORAL
A deputada de En Marea Paula Vázquez Verao tamén se referiu a un cambio de goberno que cualificou de "positivo" e remarcou que Galicia "debe ter un papel protagonista" na nova etapa aberta a nivel estatal. Nesta liña, avanzou que En Marea "non renuncia ao obxectivo" de conseguir a derrogación da reforma laboral a pesar das dificultades que presenta avanzar nesa liña pola correlación de forzas no Congreso dos Deputados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.