Por E.P. | SANTIAGO DE COMPOSTELA | 07/06/2018 | Actualizada ás 18:54
A secretaria xeral do Sindicato Unificado de Policía (SUP), Mónica Gracia, considera necesaria a creación dun "plan estratéxico a medio-longo prazo" que permita repor o cadro de Policía Nacional que require Galicia. Gracia cualificou este tema como unha "cuestión de Estado", xa que lembra que Galicia arrastra falta de efectivos desde o inicio da crise, momento no que as convocatorias se reduciron "de 3.000 e 5.000 a 100 ou 200 novos empregos".
Nunha entrevista concedida a Europa Press con motivo da súa presenza no IX Congreso Federal do SUP en Galicia, destacou que o plan estratéxico que reclama a secretaria xeral do SUP pretende "suplir o déficit das xubilacións e crear novos postos de traballo". "Atopámonos con 10.000 efectivos menos que hai uns anos", apuntou.
Ademais, Mónica Gracia entende que "as novas promocións deberían recibir unha formación máis lixeira", xa que, segundo advirte, "os opositores ás prazas vacantes non serán policías até pasados dous anos".
PARA GALICIA
Con todo, a secretaria xeral do SUP asegura que a falta de efectivos non é o único mal que padece Galicia. Así, define o país como "punto neurálxico do narcotráfico" pola "súa situación xeográfica", xunto con Xibraltar.
"Para paliar o tráfico de drogas non abonda a dotación de máis persoal, senón que se necesitan máis materiais e formación específica", engade. Sen tecnoloxía nin técnicas avanzadas, Gracia considera que "os policías sempre irán por detrás dos delincuentes".
Ademais destas tres reivindicacións, a secretaria xeral do SUP fixo un recoñecemento para os efectivos policiais que axudaron nos incendios de Chandebrito, en Nigrán (Pontevedra), o verán pasado e que "non estaban de servizo". "É un feito meritorio", considera.
Gracia tamén considera necesario a habilitación de módulos de custodia para o Hospital de Ourense, así como a creación de Unidades de Protección e Reacción (UPR) en Lugo, Pontevedra e Ferrol ante "a necesidade de equipos que actúen como reforzos inmediatos".
Por último, referiuse aos casos de corrupción que incumben ao ámbito político. Respecto diso, cre que a independencia do Corpo Policial é un "alicerce fundamental" para loitar contra esta "secuela" e exercer de forma efectiva o seu labor.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.