Científicos galegos participan en novos achados xenéticos sobre o risco de padecer cancro de próstata

Membros do Instituto de Investigación Sanitaria de Santiago (Idis) participan nun traballo internacional que identificou 63 novas variantes xenéticas que contribúen ao risco de desenvolver cancro de próstata.

Por Galicia Confidencial | Santiago de Compostela | 13/06/2018 | Actualizada ás 15:33

Comparte esta noticia

Un traballo colaborativo internacional no que participan investigadores do Instituto de Investigación Sanitaria de Santiago (idis) acaba de identificar 63 novas variantes xenéticas que contribúen ao risco de desenvolver cancro de próstata. Estes resultados axudarán ao deseño de estratexias de screening e no manexo clínico dos pacientes. Destas variantes, reportadas nas revistas Nature Genetics e Nature Comunications, 62 son variantes comúns que predispoñen ao cancro de próstata en xeral mentres que outra delas predispón especificamente ao cancro de próstata que desenvolven os homes antes dos 55 anos, moito máis grave.

Os doutores Antonio Gómez Caamaño e Ana Vega
Os doutores Antonio Gómez Caamaño e Ana Vega | Fonte: IDIS.

O de próstata é o cancro máis frecuente en homes en países occidentais. Un de cada sete homes vai ser diagnosticado de cancro de próstata ao longo da vida. Entre os factores de risco a desenvolver cancro de próstata atópanse a idade, a historia familiar de cancro de próstata e a etnia ou grupo poboacional do individuo (o cancro de próstata é máis frecuente en homes africanos, seguidos de europeos e asiáticos). Coñécense poucas variantes xenéticas que confiran alto risco para desenvolver cancro de próstata, as máis importante son as mutacións no xene BRCA2, que se identifican ademais nunha porcentaxe de familias con cancro de mama/ovario hereditarios. 

Os estudos de asociación de xenoma completo (GWAS) permitirán identificar ata o momento 104 variantes xenéticas asociadas á susceptibilidade de padecer cancro de próstata. Cada unha destas variantes identificadas a través de estudos GWAS afectan moderadamente ó risco, pero como son variantes xenéticas comúns na poboación xeral, o seu impacto acumulado é importante.

Estes achados son o resultado do traballo do Consorcio internacional PRACTICAL (Prostate Cancer Association Group to ivestigate cáncer Associated alterations in the Genome), un gran esforzo que involucrou a investigadores de ao redor de 60 institucións diferentes países, só tres deses grupos son españois e deles, dous galegos. En total, analizaron datos xenéticos de 140.000 homes, dos cales 80.000 foran diagnosticadas con cancro de próstata.

O doutor Antonio Gómez-Caamaño do Servizo de Oncoloxía Radioterápica do Hospital Clínico de Santiago, e as doutoras Laura Fachal e Ana Vega Gliemmo, da Fundación Pública Galega de Medicina Xenómica, todos eles investigadores do Instituto de investigación Sanitaria de Santiago (Idis) participaron como coautores nestas publicacións a través do estudo PROGRESS, que inclúe preto de 1.400 pacientes con cancro de próstata e controles da área sanitaria de Santiago de Compostela.

No estudo publicado na revista Nature Genetics, os investigadores inclúen preto de 80.000 pacientes e máis de 60.000 controis, e a través dun estudo de asociación de xenoma completo, o maior estudo ata a data, identifican 63 novas rexións do xenoma implicadas no desenvolvemento de cancro de próstata. Delas, 62 asociáronse co desenvolvemento do cancro de próstata en xeral e outra se asocia ao desenvolvemento de cancro de próstata en pacientes menores de 55 anos.

Ademais, o estudo permite confirmar a asociación de 75 das 104 rexións asociadas co cancro de próstata previamente identificadas. As rexións máis fortemente asociadas foron as implicadas nos mecanismos de reparación do ADN e mecanismos de progresión do ciclo celular. Ademais, a análise das rutas biolóxicas realizada mediante asociación de variantes a xenes próximos, identificou unha ruta relacionada coa resposta inmune dos pacientes, como a máis importante.

O segundo dos traballos, publicado en Nature Comunications, céntrase en estudar con moita profundidade a 88 das rexións asociadas co desenvolvemento do cancro de próstata co obxectivo de identificar as variantes causais dentro destas rexións.

Estes achados aumentan significativamente a nosa comprensión da base herdada do cancro de próstata, e abre as vías a novas investigacións, destaca Ana Vega, quen engade que “a identificación da variación xenética que aumenta a susceptibilidade para desenvolver cancro de próstata redundará nunha mellora do diagnóstico, tratamento e prognóstico da enfermidade.”

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta