Ecoloxistas en Acción súmase á oposición contra a mina de cobre en Touro e O Pino

A ONG trae o seu veleiro 'Diosa Maat' a Ribeira e organiza varias actividades ao longo desta semana para concienciar sobre os perigos de reabrir esta mina.

Por Galicia Confidencial | Ribeira | 25/06/2018 | Actualizada ás 18:03

Comparte esta noticia

O veleiro Diosa Maat, icona da ONG Ecoloxistas en Acción, atracou na ría de Arousa esta fin de semana para apoiar a loita en contra da posible reapertura da mina de cobre de Touro-O Pino, que "presenta graves perigos para o medio ambiente, incluíndo á poboación dos arredores", alerta a organización.

O veleiro Diosa Maat, icona da ONG Ecoloxistas en Acción.
O veleiro Diosa Maat, icona da ONG Ecoloxistas en Acción.

Desde a plataforma ContraMINAcción e a organización Ecoloxistas en Acción coordinaranse estes días diferentes accións e actividades co obxectivo de unir forzas e "poñer fin ao perigoso proxecto".

O buque insignia de Ecoloxistas en Acción, Diosa Maat, atracou na tarde do sábado día 23 de xuño no porto de Ribeira para coordinarse coas distintas organizacións que loitan contra a posible instalación dun proxecto mineiro en Touro-O Pino que, alertan, "podería afectar moi gravemente á ría de Arousa e ao modo de vida sustentable de miles de familias que dependen da calidade das augas desta ría para o seu sustento".

Activistas do veleiro Diosa Maat van coordinarse ao longo desta semana con distintas organizacións galegas que loitan contra a minería contaminante para abordar estratexias conxuntas para poñer fin a estes proxectos. "O caso da mina de Touro, forma parte dun fenómeno maior que se está dando en diversos puntos de España, como son as balsas de  Riotinto ou a mina de Santander", explican desde a ONG.

ACCIÓNS

Nos próximos días proxectan asistir o mércores día 27 ao pleno convocado polo Concello do Pino onde a oposición municipal presenta unha moción contra a mina así como varias preguntas relacionadas coas últimas denuncias realizadas contra a explotación. Neste pleno, os veciños pediron tamén unha intervención para solicitar ao Concello o rexeitamento á mina. 

Durante a xornada, as persoas que representan a Ecoloxistas en Acción darán unha rolda de prensa e aproveitarán para visitar Touro. Durante o encontro con persoas da plataforma Mina de Touro-O Pino NON, compartirán experiencias na loita contra Atalaya Mining, onde Isidoro  Albarreal, de Ecoloxistas en Acción en Sevilla e outros destacados activistas farán unha exposición da traxectoria e situación da loita pola paralización da mina de Riotinto, impulsada pola mesma compañía mineira.

O día 28, Ecoloxistas en Acción convidará os medios de comunicación a unha visita a bordo, e se as condicións meteorolóxicas permíteno, farán unha saída pola ría. Pola tarde terá lugar unha mesa de traballo en Ribeira entre Ecoloxistas en Acción e distintas organizacións galegas de  ContraMINAcción que traballan contra a minería contaminante. Aquí explicarase a situación das diferentes loitas contra os proxectos de Atalaya Mining en Riotinto e Touro-O Pino e compartiranse experiencias e estratexias.

Durante esta semana, Ecoloxistas en Acción convidará o público en Ribeira a participar na súa campaña contra a  sobrepesca coa actividade “Como Peixe na auga” xunto a outras dinámicas. O taller consiste na recollida de fotos de persoas con caretas de peixes a modo de recollida de firmas para facer unha montaxe final e enviala a Bruxelas para pedir mellores leis e aplicación para combater a  sobrepesca.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Vijo

Quien paga todo este costoso despliegue naval?