A comisaria de Transportes reúnese o 10 co ministro Ábalos para pedir unha investigación independente

A comisaria europea de Transportes, Violeta Bulc, reunirase o próximo 10 de xullo co novo ministro de Fomento, o socialista José Luís Ábalos, ao que reclamará unha investigación "independente" sobre o accidente do tren Alvia ocorrido o 24 de xullo de 2013, fai agora case cinco anos, no barrio compostelán de Angrois.

No sinistro, que no plano xudicial mantén a sete persoas investigadas (entre eles, dous altos cargos de Adif e un de Renfe), morreron 80 persoas e 144 resultaron feridas. O maquinista tomou cun exceso de velocidade a curva da Grandeira, onde non estaba instalado o sistema de control da velocidade 'ERTMS'. Ademais, este mecanismo desconectouse na súa modalidade embarcada, dentro do convoi, por problemas de interferencias.

Nunha reunión en Bruxelas acompañados pola portavoz nacional do BNG, Ana Pontón, e a eurodeputada nacionalista Ana Miranda, a comisaria trasladou ás vítimas que prevé verse co novo titular de Fomento do Goberno de Pedro Sánchez. Ademais, indicou que o informe que a Comisión elabora para avaliar se o Estado español incumpriu a normativa de seguridade ferroviaria estará listo en "dous ou tres semanas".

A semana pasada chegou ao xulgado, precisamente, outro informe da Axencia Ferroviaria Europea (que lle solicitou o instrutor da causa) que recolle que a curva requiría unha avaliación de riscos, así como o cambio do proxecto da liña Ourense-Santiago e a mencionada desconexión do 'ERTMS'.

"ALGO FRUSTRANTE"

En declaracións aos xornalistas ao termo da reunión, un portavoz da plataforma de afectados o accidente, Arturo Domínguez, mostrouse cunha "sensación ambigua" pola "parte frustrante" que implica recibir o apoio da comisaria que, á súa vez, recoñece que legalmente non pode esixir a un Estado membro que acometa dita investigación. "Ela está tan frustrada como nós por que non se investigue de forma independente", destacou. De feito, a comisaria xa fixo chegar esta petición ao anterior responsable do ministerio, o popular Íñigo de la Serna, despois da comparecencia das vítimas na comisión de peticións do Parlamento Europeo.

España levou a cabo unha investigación do sinistro de Angrois que determina que a responsabilidade foi do maquinista por conducir cun exceso de velocidade. Con todo, após intervir Europa, o Goberno central viuse obrigado a modificar a forma en que son designados os membros da CIAF (a comisión de investigación, inscrita no Ministerio de Fomento) e desde entón non houbo un novo informe.

Domínguez, como Javier García Municio, outro membro da asociación de vítimas, apuntou á "esperanza" que supón que a Unión Europea lles apoie nas súas reivindicacións, en prol de "que se coñeza toda a verdade". De feito, García Municio animou ás novas autoridades a "que sexan valentes" e demostren que teñen "as mans limpas", posto que a normativa europea "esixe unha investigación independente" e a CIAF non ten "ningunha fiabilidade". Tamén os propios afectados solicitaron unha reunión ao novo ministro José Luis Ábalos, ao que lle esixen o cesamento dos altos cargos investigados na causa xudicial polo accidente. "É inexplicable que non dimitise ninguén", recalcou Domínguez. "Doe moito", recalcou.

"MOI INXUSTO"

Fronte a esta "traxedia evitable", a líder do BNG lamentou como "moi inxusto" que as vítimas teñan que acudir "peregrinando" a Europa para que as súas demandas sexan escoitadas. Así, valorou a súa "loita de titáns" e censurou que haxa "demasiadas interferencias" como as que implicaron que as respostas da Axencia Ferroviaria Europea non chegasen ata que mediou o propio Bloque. Ao seu xuízo, así mesmo, é "delirante" que non se poida esixir a España que investigue de forma independente, no que entende como "unha trampa".

Ana Miranda, ao seu lado, adiantou que "haberá que pedir unha comisión de investigación" na Eurocámara se o informe da Comisión pendente determina a necesidade de apertura dun expediente contra o Estado español. "Terá que vir unha misión a Galicia", avanzou.