En Marea afirma que os informes presentados pola valedora "demostran" que participou no nomeamento anulado
Indica que un informe incluído na documentación con instrucións de Otero está datado mes e medio despois abstivésese do proceso.
Por E.P. | SANTIAGO DE COMPOSTELA | 07/07/2018 | Actualizada ás 19:10
En Marea afirmou que, unha vez consultados os informes presentados pola valedora do Pobo, Milagros Otero, durante a súa comparecencia en sede parlamentaria o pasado xoves, esta documentación "demostra" que Otero participou na elección de María Puy Fraga como xefa de persoal da institución, nomeamento que foi anulado polo TSXG por irregularidades.
Así, nun comunicado emitido este sábado, o portavoz rupturista, Luís Villares, asegura que os informes revelan que Otero continuou participando no proceso de selección a pesar de que, oficialmente, "mes e medio antes" apartárase do mesmo pola súa relación cunha das candidatas, María Puy, irmá do portavoz parlamentario do PPdeG, Pedro Puy, e filla do Catedrático de Dereito mentor da valedora.
Deste xeito, Villares incide en que a documentación coa que se defendeu o pasado xoves Milagros Otero na súa comparecencia ante a Comisión de Peticións da Cámara galega reflicte "exactamente o contrario" que o esgrimido pola valedora no Parlamento.
Neste sentido, apunta que nesta documentación inclúe un informe datado no 4 de marzo de 2016, un mes e medio despois de que a valedora anunciase a súa abstención. "Nel, a valedora dá instrucións sobre o que ela considera de especial importancia para o óptimo desempeño das funcións desa praza e sinala que preferencias, valoracións e méritos deben de ser tidos en conta con máis intensidade para o posto que vai desempeñar", asegura Villares.
Así as cousas, o portavoz rupturista cre que este feito "avala unha vez máis a petición de cesamento da valedora" pola súa participación nun nomeamento no que, segundo a sentenza da Sala do Contencioso Administrativo do TSXG, Milagros Otero cometeu "desviación de poder" e "arbitrariedade" durante un procedemento orientado a favorecer á persona finalmente escollida, deixando ao carón os méritos do resto de candidatos, que non foron tidos en conta.
Por tanto, insta ao PP a "deixar de protexer á valedora como fixo na comisión do pasado xoves mantendo un sistema corrupto no que se pagan os favores de nomeamentos enchufando aos amigos".
PLENO
O futuro de Milagros Otero á fronte do Alto Comisionado do Parlammento galego será un dos temas que centrarán o pleno que arrinca este martes no Pazo do Hórreo. Alí, os grupos debaterán sobre a continuidade da valedora, que xa indicou o pasado xoves na Comisión de Peticións que non ten intención de renunciar porque afirma inhibirse do procedemento declarado irregular polo TSXG.
É necesario que unha maioría cualificada de tres quintos da Cámara (45 deputados) para confirmar o seu cesamento, polo que o apoio do PP, que aínda non desvelou a súa postura, resultaría imprescindible.
