Convidan a Dolce&Gabbana a realizar un pase de moda en Viana do Bolo para compensala pola copia do Boteiro

O rexedor de Viana do Bolo, Secundino Fernández, acaba de remitirlle unha carta a empresa de moda Dolce&Gavanna (D&G) para pedir que, polo menos, recoñezan que unha das prendas da súa colección de primaveira 2018 é unha “copia” do traxe de “Boteiro” do entroido da comarca de Viana. E, ademais, convida aos deseñadores da firma de moda a visitar o concello e realizar alí un pase de moda cos deseños inspirados no entroido vienés.

"O disgusto de Viana do Bolo, da veciñanza foi grande cando nin tan sequera se mencionou a orixe da inspiración. Non se mencionou nin se recoñeceu a esta figura centenaria da nosa tradición nin as artesás que elaboran as camisas e que mantiveron esa tradición, que pasa fundamentalmente de nais a fillas”, denuncia o rexedor.

Por este motivo, pide que se recoñeza publicamente que é o “Boteiro” a fonte de inspiración dos seus deseños. “Énchenos de orgullo que a nosa figura se recoñeza a nivel mundial a través da súa firma, e iso é exactamente o que pedimos, que se faga mención ao feito de que a colección está inspirada na figura do “Boteiro” do Entroido do concello de Viana do Bolo”, indica.

Con todo, convida aos deseñadores da firma a que visiten o Entroido da localidade para que comproben a “emoción” que envolve este evento e a súa principal figura, o “Boteiro”. Ademais, “como feito de desagravio e como mostra de hospitalidade”, convídanos a mostrar esas creacións inspiradas no Boteiro en Viana do Bolo nun desfile do moda polo casco histórico, “no propio entorno natural e cultural do Boteiro”.