Por E.P. | SANTIAGO DE COMPOSTELA | 30/07/2018 | Actualizada ás 19:25
O goberno de Santiago viaxará a Madrid este venres para reunirse con representantes do Ministerio de Medio Ambiente co obxectivo de abordar a construción da nova Estación Depuradora de Augas Residuais (EDAR). Así o confirmaron o delegado do Goberno en Galicia, Javier Losada, e o alcalde compostelán, Martiño Noriega, que este luns mantiveron o seu primeiro encontro desde que o exregidor herculino asumise o cargo de representante do Estado na Comunidade galega.
Deste xeito, o goberno compostelán reunirase o vindeiro venres 3 de agosto co secretario de Estado de Medio Ambiente, Hugo Morán. Alí, exporán o proxecto municipal para a renovación e ampliación da actual planta da Silvouta como alternativa á localización de O Souto. "É xusto recoñecer cando hai institucións que colaboran para facilitar estas reunións que en condicións normais atrasaríanse até setembro", asegurou Noriega. E é que o cambio de localización para a nova planta foi rexeitado polo Goberno central durante a etapa do PP.
"Estou convencido que serán escoitados e, se se pode facer, ir da man. Porque creo que os problemas, os proxectos e as actuacións canto mellor sexan consensuadas máis fácil é facelo", incidiu Javier Losada.
OUTRAS ACTUACIÓNS
Doutra banda, no encontro deste luns, Losada e Noriega tamén abordaron outras actuacións da Administración central na capital galega, como a construción da autovía a Lugo, a ligazón orbital, a conexión da AP-9 coa Cidade da Cultura e a estación intermodal. O delegado do Goberno afirmou que todas elas "van por bo camiño" e destacou que Moncloa "deu pulo" á autovía con Lugo para que estea lista en 2021, ano do próximo Xacobeo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.