Guitiriz contará cunha nova residencia de maiores con 52 prazas

O presidente da deputación de Lugo, Darío Campos Conde, anunciou, logo da xunta de goberno provincial, que se acordou o proxecto para construír unha nova residencia de maiores en Guitiriz, que se suma ás outras dez xa en construción ou en fase embrionaria para o seu desenvolvemento en toda a provincia.

Dito centro, que se emprazará na antiga Casa da Botica, conta cun investimento de 1,4 millóns de euros, dos que 1,2 millóns proceden de achegas do goberno provincial e 200.000 do concello. Dita residencia, segundo o presidente da institución, "ofrecerá atención a 52 maiores da provincia, porque a residencia de Guitiriz non leva centro de día e pódense ampliar as prazas".

Campos Conde apelou a que "se trata dunha infraestrutura moi demandada en Guitiriz, con moitos veciños deste municipio que están en centros de Castro de Rei, O Incio, Quiroga ou Outero de Rei". Ademais, avanzou que se licitará no mes de setembro, polo que as obras comezarán a finais de ano.

RESIDENCIA EN BECERREÁ

Outro dos puntos que se tratou na xunta de goberno é "iniciar os trámites para a rescisión de contrato para a construción do centro residencial de Becerreá", que financia a Deputación por máis de 4 millóns de euros, ao solicitalo a "empresa adxudicataria".

Darío Campos Conde precisou que xa se puxeron en contacto co concello do municipio "para informar sobre esta solicitude, e cando o consistorio confirme que está de acordo con esta solicitude continuarase co proceso".

Neste sentido, o presidente da Deputación calculou que nas próximas semanas emendarase este inconveniente "para, unha vez reasignado o contrato, e cando o Concello dea o visto e prace, iniciar o proceso de adxudicación das obras para contratalas de novo". Sexa como sexa, o "compromiso" para realizar a dita residencia segue sendo "firme" por parte do goberno provincial.