Por Galicia Confidencial | Santiago de Compostela | 10/08/2018 | Actualizada ás 21:42
A Luis del Pino coñéceselle pola fotografía do seu avatar coa cara pintada coa bandeira española e por ser parte do que se chama "caverna mediática española", á dereita da dereita política. Na súa particular cruzada contras a linguas propias das comunidades históricas, Pino emprendeu un ataque frontal, case sádico, contra a lingua galega e a Xunta de Galicia, a cal, malia estar en mans do Partido Popular, non é o españolista que cabería pensar... na mente deste xornalista cavernoso.
Pino, que é director do faladoiro político 'Sin Complejos' en esRadio —editado por Libertad Digital, altofalante da ultradereita española liderado por Federico Jiménez Losantos—, non tivo outra ocorrencia que perder o seu tempo esixindo á Xunta que publique en español na súa conta de Twitter.
"No falla: es criticar el hecho de que la Xunta de Galicia ignore el español en sus tuits, y salen todos los talibanes del separatismo gallego más radical a insultarte y a defender que Feijóo excluya el español. Quod erat demonstrandum", publicou onte, xoves, Pino na súa conta en Twitter, con copia da mensaxe para Pablo Casado, presidente do Partido Popular.
Días antes, o xornalista da caverna xa publicara este outro chío: "Número de tuits en español publicados por la Xunta de Galicia desde que Pablo Casado se hiciera con las riendas del PP: ninguno. Exactamente igual que antes. Liderando la España de los balcones y tal".
A provocación de Pino recibiu numerosas mostras de apoio desde toda España, pero tamén respostas de moitos usuarios de Twitter que defenderon o que é lóxico: que a Xunta debe comunicarse en Twitter na lingua propia do noso país.
Entre os que aportaron argumentos contra Pino estaba o director da Editoria Galaxia, Francisco Castro, quen lle respondeu: "Pero como a Xunta vai facer iso en castelán??? O normal é que o twitter da Xunta sexa en galego. O normal. O anormal sería que non o fixese. Vostede ou descoñece a lóxica lingüística ou, témome, se la repanfinfla".
Ao que Pino contestou: "Su fascismo lingüístico no me interesa, buen hombre".
Foi nese momento cando entrou na conversa o alcalde de Lalín, Rafa Cuíña, quen espetou a Pino: "Le llama “buen hombre” al director general de Galaxia? Una editorial ejemplar??".
No seu xa clásico e pesado ton déspota, o xornalista dixo a Cuíña, sobre Francisco Castro: "Como si dirige la ONU. Quien pretende negar a los demás sus derechos demuestra no respetar a los demás".
Segundo Luis del Pino e os seus correlixionarios, a Xunta, gobernada polo PP, tira cara ao nacionalismo galego. Semella unha mala broma dos nacionalistas españois.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.