As vendas do comercio polo miúdo volven a terreo negativo en Galicia

As vendas do comercio polo miúdo descenderon un 0,8% en Galicia en xullo en comparación ao mesmo mes de 2017, segundo os datos que publica este venres o Instituto Nacional de Estatística (INE).

Deste xeito, as vendas do comercio polo miúdo galegas volven a terreo negativo despois de oito meses en positivo. A última baixada interanual produciuse en outubro de 2017.

Esta baixada é maior que a producida na media no Estado (-0,6%). Así, Galicia rexistra a sétima maior caída entre comunidades, que lidera Cataluña (-2,5%). No outro extremo, Aragón está á cabeza no aumento das vendas (+1,9%).

Con todo, de media do que vai de ano --entre xaneiro e xullo--, hai un aumento do 1,2% nas vendas do comercio polo miúdo na Comunidade, dado que o resto de meses tivo cifras positivas.

No tocante á ocupación, hai un aumento interanual en Galicia do 1,3% en xullo. Neste caso supón un avance maior que o 1% que se produce na media española. De media do que vai de ano, o incremento galego é do 1%.