Por E.P. | VIGO | 04/09/2018 | Actualizada ás 18:20
Os traballadores do servizo XER (Xestión do Estacionamento Regulado) ou zona azul de Vigo anunciaron que retomarán a folga indefinida iniciada a principios de agosto, que suspenderan cando levaban poucos días de paro para negociar coa empresa.
Segundo confirmou o sindicato UGT, os representantes do cadro mantiveron unha mediación coa empresa concesionaria do servizo (Dornier) para tratar de reconducir o conflito, iniciado após o despedimento de 8 traballadores (un mes despois de que a empresa se fixera co servizo en concurso público).
O sindicato denunciou a actitude "inmovilista, reaccionaria e antisindical" de Dornier, e confirmou a decisión do cadro de retomar o paro.
A subrogación dos traballadores após a nova adxudicación é unha condición obrigada, polo que, despois dos despedimentos e as protestas do cadro de persoal, o Concello de Vigo abriu un expediente á empresa.
Segundo se recolle no propio prego de condicións da adxudicación, unha infracción desta natureza pode desembocar nunha sanción de entre 6.001 e 12.000 euros, pero o goberno municipal xa advertiu de que non descarta mesmo rescindir o contrato con Dornier.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.