Activo un incendio forestal provocado por un raio nos Ancares
O lume comezou en Cervantes sobre as 18.08 deste xoves e xa queimou máis de 20 hectáreas.
Por E.P. | SANTIAGO DE COMPOSTELA | 28/09/2018 | Actualizada ás 10:29
Un incendio forestal que, segundo as primeiras estimacións, afecta a 20 hectáreas de monte e foi provocado por un raio, permanece activo no Concello lugués de Cervantes, na parroquia de Donís.
Así o informou este venres a Consellería do Medio Rural nun comunicado, no que precisou que o incendio comezou o pasado xoves 27 de setembro ás 18,08 horas.
Ademais, indicou que parece ser provocado por un raio. No control do incendio traballan tres axentes, 13 brigadas, dúas motobombas e catro helicópteros.
A Consellería do Medio Rural lembra tamén que está a disposición da cidadanía o número de teléfono gratuíto 085, ao que se debe chamar en caso de detectar algún incendio forestal. Así mesmo, toda a información actualizada sobre incendios forestais poderá ser consultada na conta aberta de Twitter: @incendios085.
