Marea de Vigo elixirá candidato para as municipais o 10 de novembro mediante primarias
Será no local da formación na rúa Camelias da cidade olívica e as persoas con dereito a voto só poderán exercelo de maneira presencial.
Por E.P. | VIGO | 18/10/2018 | Actualizada ás 17:25
As candidaturas que se presenten a esas primarias faranse públicas o día 2 de novembro, data na que dará comezo a súa campaña interna. As persoas con dereito a voto poderán exercelo "só" de "maneira presencial" e demostrando a súa condición de censadas en Vigo. Estas condicións reflíctense nun documento elaborado este mércores nunha reunión celebrada polo grupo político no seu local.
Neste documento quedan establecidos os prazos para a presentación de candidaturas e os requisitos para aqueles que se presenten como "cabeza de lista", que terán que "asumir" o programa da Marea de Vigo e contar co aval de 10 membros dos "grupos de traballo" da formación.
Segundo trasladou Marea de Vigo, os concelleiros do grupo municipal Rubén Pérez, Marga López Barreiro e Xosé Lois Jácome participaron "activamente" na asemblea e presentaron "un resumo" da actividade realizada no Concello nos últimos meses. Rubén Pérez, portavoz no Concello, centrouse no proceso de redacción da novo PXOM de Vigo e na Ordenación Provisional do urbanismo da cidade, que será aprobado definitivamente nos vindeiros meses.
