Canción para Conde Roa na Radio Galega
O grupo de Muros adica unha canción na emisora pública galega ao próximo alcalde de Santiago de Compostela e a súa teima por botar ao movemento 15M da Praza do Obradoiro.
Por Galicia Confidencial | Santiago | 10/06/2011 | Actualizada ás 10:32
O programa "Planeta Furancho" da Radio Galega invitou ao grupo Terbutalina este mércores. Os muradáns aproveitaron a súa presencia no programa musical da emisora pública para adicarlle un novo tema a Xerardo Conde Roa. Unha canción moi crítica co próximo alcalde conservador de Santiago e as súas continúas peticións para botar aos "indignados" do Obradoiro:
"Ei ti, fóra de aquí, ei ti, enches de merda o Obradoiro, ei ti, voute mazar, que eu son Conde Roa, ostias para todos, ostias para todos, e para ti tamén, e para ti sobre todo" arranca a peza.
"Ei ti, eres un jipi de mierda, enchésme o Obradoiro de mierda, voute mazar, que eu son, Conde Roa ...." prosegue o tema cantado en directo en Planeta Furancho.
Cómpre lembrar que o político conservador cualficou varias veces de "okupas" aos activistas do movemento 15M, pedindo que a Policía acabase coa mobilización na Praza do Obradoiro ante o suposto impacto negativo no turismo.
"Vós sodes totalmente libres?" pregunta tras a canción o locutor. A banda de rock responde con ironía e destacando o carácter divertido da súa música.
Terbutalina ten na rúa un disco de presentación gravado en directo. O "Live in Catoira" contén oito temas destes irreverentes músicos publicados pola Regueira Plataforma, especializada na difusión na Rede da cultura galega actual. Pódese descargar de balde aquí.
