Declarado un aparatoso incendio en Ence Pontevedra sen danos persoais
Ardeu unha torre de refrixeración diante de oficinas. O lume xa está apagado.
Por Europa Press / Redacción | PONTEVEDRA | 05/12/2018 | Actualizada ás 10:34
Ao redor do nove da mañá deste mércores declarouse un aparatoso incendio na fábrica de Ence, na ría de Pontevedra. Segundo indicaron traballadores da empresa, ardeu unha torre de refrixeración diante de oficinas e á beira do secapastas, unha instalación nova. Pero o lume xa está apagado.
Segundo informou o 112, non hai danos persoais, pero as chamas alcanzaron unha importante altura e xeraron unha densa columna de fume. No lugar do suceso atópanse varias dotacións dos bombeiros de Pontevedra.
Desde o primeiro momento traballan na extinción os medios propios da empresa. A Policía Local asegurou que o incendio está controlado e os bombeiros confirmaron este extremo. Os traballadores desaloxaron a instalación fabril ao saltar a alarma e reuníronse ás portas do complexo. No entanto, sobre o dez da mañá xa puideron volver aos seus postos de traballo.
APAGADO
Ence deu por "totalmente extinguido", pasadas as 10,00 horas deste mércores, o aparatoso incendio que afectaba desde as 9,00 horas á súa fábrica situada na ría de Pontevedra. Nun comunicado, a empresa sitúa o incendio "nun equipo da biofábrica de Lourizán" e anuncia que analizará as causas. Ademais, destaca que non se produciron danos persoais e que a totalidade dos traballadores están "en perfecto estado".
Aínda que as chamas alcanzaron unha importante altura e xeraron unha densa columna de fume, a empresa subliña que o fume "non afectou as poboacións circundantes". Así mesmo, Ence destaca que os seus sistemas de emerxencia "funcionaron correctamente, o que permitiu solucionar rapidamente o incidente". En calquera caso, agrega que a intervención do servizo de bombeiros permitiu "extinguir totalmente" as chamas.
