Por Galicia Confidencial | A Coruña | 21/12/2018 | Actualizada ás 14:12
As mudanzas en La Voz de Galicia están levando ao "caos" a este xornal. Así o denuncian fontes internas, que critican a nova organización do traballo que deseñou a dirección para 2019 e o xeito de aplicar o novo modelo de negocio, coa aplicación dun muro de pago a partir do próximo mes de marzo. O descontento entre os traballadores é de tal magnitude, que mesmo hai espantada entre os xefes de sección.
O primeiro en recoller as súas cousas e liscar foi Leoncio González, un referente no xornalismo galego e xefe de Internacional da Voz, que marchou na tarde deste mércores do xornal, acolléndose ás baixas incentivadas que a empresa propón. A Corporación Voz só garante o 80% dos empregos actuais para 2019. Por iso, ten previsto desfacerse duns 60 profesionais, ben mediante baixas incentivadas ou por despedimento.
O seguinte en marchar será Tino Novoa, xefe da sección España, que deixará o xornal nunhas semanas, segundo confirmaron fontes de La Voz a Galicia Confidencial.
González e Novoa pode que non sexan os únicos. "Outros dous xefes de sección están a facer números para ver se lles compensa o plan de baixas incentivadas", din as fontes consultadas.
A estes únense varios redactores e redactoras da redacción central de Sabón e das delegacións que marcharon nas últimas semanas.
A situación agora mesmo é de tensión. "Todos se queixan da nula sintonía co director de La Voz e o director xeral", afirman as fontes de GC.
Segundo estas, os movementos dos xefes de sección "desbaratan" o plan ideado por Lois Blanco (director xeral da Corporación), Xosé Luís Vilela (director do xornal) e Tomás García (director da edición dixital), que "terán que refacer o organigrama" que tiñan previsto activar a partir do 7 de xaneiro.
Moitos xornalistas pensan que o plan é "improvisado" e que "trae o caos á redacción", xa que os subdirectores —César Casal e Fernando Hidalgo— e os dous redactores xefe que coordinarán a nova mesa central —Laureano López e Antón Fernández— "non teñen ningunha experiencia en xornalismo dixital", afirman.
REORGANIZACIÓN
O xornal coruñés mudará o seu organigrama o 7 de xaneiro de 2019 e a partir de marzo aplicará un muro de pago a algúns contidos. A empresa defende que a nova organización mellorará a calidade de vida dos empregados. O comité denuncia que se perderán 60 empregos e se seguirá recortando salarios.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.